မိုင်းရူပ၊ သြဂုတ် ၂၀ ရက်၊ ဆီဆိုင်
ရှမ်းတောင် ပအိုဝ်းဒေသ ဆီဆိုင်မြို့နယ်ရှိ ကျေးရွာ ၃ ရွာက နေအိမ်ပေါင်း ၁၀၀ ကျော်ကို စစ်ကောင်စီ လက်အောက်ခံ ပအိုဝ်းပြည်သူ့စစ်- PNO/PNA က မီးရှို့ဖျက်ဆီးခဲ့ကြောင်း ပအိုဝ်းတပ်မတော်- PNLO/PNLA ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
မီးရှို့ခံရတဲ့ ကျေးရွာတွေထဲ နောင်ဗိုး၊ နောင်ထော်ရွာသစ်နဲ့ တပူးထိုး စတဲ့ကျေးရွာက နေအိမ်တွေဖြစ်ပြီး အဲဒီကျေးရွာတွေဟာ PNO စစ်ကြောင်း ဝင်ရောက်လာပြီးနောက် နေအိမ်တွေ မီးရှို့ခံခဲ့ရတယ်လို့ ဆိုပါတယ်။
“အဲဒီရွာတွေဆိုရင် အခုထိ ပြည်သူတွေ အိမ်ပြန်လို့ မရသေးဘူး။ သူတို့ မောင်းထုတ်ထားတယ်။ ပစ္စည်းတွေ ယူတယ်။ အိမ်တွေကို မီးရှို့တယ်။ မီးရှို့ခံရတဲ့ အိမ်တွေက အိမ်ကြီး၊ အိမ်ကောင်းတွေ ပါတယ်။ စာရင်း အတိအကျ မရသေးပေမဲ့ မီးရှို့ခံရတဲ့ နေအိမ်ပေါင်း ၁၀၀ ကျော်ရှိပြီ” လို့ PNLA ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
PNO က မီးရှို့ခဲ့တဲ့ ကျေးရွာတွေရဲ့ မှတ်တမ်းကို PNLA ဘက်က ပြီးခဲ့တဲ့ သြဂုတ် ၁၈ ရက်မှာ ဒရုန်းနဲ့ မှတ်တမ်း ယူနိုင်ခဲ့ပြီး တိုက်ပွဲ ဖြစ်ပွားတာမရှိဘဲ ပအိုဝ်းပြည်သူ့စစ်က လူထုနေအိမ်တွေကို မီးရှို့နေတာဖြစ်တယ်လို့ ခွန်ရိန်းယံက ဆက်ပြောပါတယ်။
PNO ဘက်ကတော့ လူထုတွေရဲ့ နေအိမ်တွေကို မီးရှို့နေတယ်ဆိုတဲ့ PNLA ရဲ့ ပြောကြားချက်နဲ့ ပတ်သက်ပြီး တစုံတရာ တုန့်ပြန်ထားတာ မရှိသေးပါဘူး။
PNO/PNA အဖွဲ့ဟာ စစ်တပ်နဲ့ ပူးပေါင်းပြီး ရှမ်းတောင်အပါအဝင် ရှမ်းတောင်-ကရင်နီနယ်စပ်မှာ တော်လှန်ရေး အင်အားစုတွေနဲ့ တိုက်ပွဲ ဖြစ်ပွားနေတဲ့ စစ်တပ် လက်အောက်ခံအဖွဲ့ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
