ရွှေဖီမြေ၊ မတ်လ ၁ ရက်
မြန်မာနိုင်ငံတစ်ဝှမ်းမှာ ဖေဖော်ဝါရီလအတွင်း စစ်ကောင်စီတပ်ကြောင့် အရပ်သား ၁၀၆ ဦး သေဆုံးခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း- AAPP က မနေ့ ဖေဖော်ဝါရီ ၂၈ ရက်မှာ ထုတ်ပြန်ထားပါတယ်။
နိုင်ငံတစ်ဝှမ်းက အမျိုးသမီး ၅၃ ဦးနဲ့ အမျိုးသား ၅၃ ဦး စုစုပေါင်း ၁၀၆ ဦး သေဆုံးခဲ့ကြောင်းကို အမည်နဲ့တကွ အတည်ပြုနိုင်ခဲ့ပြီး သေဆုံးသူ ၁၀၆ ဦးထဲ အသက် ၁၈ နှစ်အောက် ကလေး ၁၆ ဦး ပါဝင်တယ်လို့ ဆိုပါတယ်။
အများစုဟာ စစ်တပ်ရဲ့ လေကြောင်း တိုက်ခိုက်မှုကြောင့် သေဆုံးခဲ့တာဖြစ်ပြီး မကွေးတိုင်းမှာ ၂၇ ဦးနဲ့ သေဆုံးမှု အများဆုံးဒေသဖြစ်ပြီး စစ်ကိုင်းတိုင်းမှာ ၂၆ ဦးနဲ့ သေဆုံးမှု ဒုတိယအများဆုံး ဖြစ်တယ်လို့ ဖော်ပြထားပါတယ်။
စစ်တပ် အာဏာ စသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကစပြီး မနေ့ ဖေဖော်ဝါရီ ၂၈ ရက်အထိ ၄ နှစ်ကျော်အတွင်း စစ်ကောင်စီတပ်နဲ့ ၎င်းတို့ရဲ့လက်ပါးစေကြောင့် နိုင်ငံတစ်ဝှမ်းက လူပေါင်း ၆ ထောင်ကျော် (၆,၃၆၄ ဦး) သေဆုံးခဲ့တယ်လို့ AAPP ကထုတ်ပြန်ထားပါတယ်။
ဒါ့အပြင် ဖမ်းဆီးခံရသူ စုစုပေါင်း ၃ သောင်းနီးပါး (၂၈,၇၁၂ ဦး)ရှိပြီး အဲဒီထဲက ၂ သောင်းကျော် (၂၁,၉၅၆ ဦး)ဟာ ထိန်းသိမ်းခံရဆဲဖြစ်ပြီး ထိန်းသိမ်းခံနေရသူထဲက ၁ သောင်းကျော် (၁၀,၄၇၂ ဦး)ဟာ ထောင်ဒဏ် ချမှတ်ခံထားရပါတယ်။
