မိုင်းဖိူမ်းဆငဲ၊ နိုဝင်ဘာ ၄ ရက်၊ မိုင်းငေါ့
တအာင်းတပ်မတော်- PSLF/TNLA ထိန်းချုပ်ထားတဲ့ မိုင်းငေါ့မြို့ကနေ စစ်ကောင်စီထိန်းချုပ်ထားတဲ့ ကျောက်မဲမြို့ဘက် ကား၊ ဆိုင်ကယ် ဖြတ်သန်းသွားလာလို့ ရပြီဖြစ်ကြောင်း ဒေသခံသတင်းရင်းမြစ်တွေဆီက သိရပါတယ်။
TNLA နဲ့ စစ်တပ်တို့ အပစ်အခတ် ရပ်စဲကြောင်း ထုတ်ပြန်ပြီးနောက် နိုဝင်ဘာ ၂ ရက်ကစပြီး မိုင်းငေါ့-ကျောက်မဲလမ်းကို ဖြတ်သန်းသွားလာခွင့် ပြုတာပဲ ဖြစ်ပါတယ်။
မိုင်းငေါ့ဒေသခံတစ်ဦးက “မနေ့တုန်းက ကျောက်မဲကို Wish ကားတစ်စီး၊ သုံးဘီး တစ်စီး၊ Canda တစ်စီး ဆင်းသွားတာ။ တောက်လျှောက် ရောက်တယ်တဲ့” လို့ ပြောဆိုပါတယ်။
ဒါပေမဲ့ ပြီးခဲ့တဲ့ အောက်တိုဘာ ၈ ရက်မှာ စစ်တပ်က ကျောက်မဲ-မိုင်းငေါ့ကြားမှာရှိတဲ့ နမ့်မန်းတံတားအနီး လေကြောင်းကနေ ဗုံးကြဲချခဲ့တာကြောင့် တံတား ထိမှန်ကာ ပျက်စီးခဲ့ပါတယ်။
လက်ရှိအချိန်ထိ တံတားကို တအာင်းတပ်ဘက်က ပြန်လည် ပြင်ဆင်နိုင်ခြင်း မရှိသေးတာကြောင့် ဒေသခံတွေ တံတားပေါ်ကနေ မဖြတ်သန်းဘဲ ရေချောင်းကနေ ဖြတ်သန်းကြရတယ်လို့ ဒေသခံတွေဆီကနေ သိရပါတယ်။
“နမ့်မန်းတံတားကို ဖြတ်ခွင့် မပေးသေးဘူး။ ကျိုးကျမှာဆိုးလို့ ပြောတာပဲ။ ရေချောင်းကိုပဲ ဖြတ်သွားရတာ”
နမ့်မန်းတံတားကို ၁၀၂၇ စစ်ဆင်ရေး ဒုတိယလှိုင်းအတွင်း TNLA က ကျောက်မဲမြို့ဘက် ထိုးစစ်ဆင်ဖို့ ပြင်ဆင်တဲ့အချိန်မှာ စစ်တပ်က တစ်ကြိမ် မိုင်းထောင် ဖောက်ခွဲခဲ့ဖူးပြီး အဲဒီတံတားကို TNLA ပြန်လည် ပြုပြင်ပေးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
