မိုင်းအရှိုင်း၊ ဧပြီ ၂၃ ရက်၊ ရွှေဖီမြေ
ကိုးကန့်တပ်မတော်- MNDAA ထိန်းချုပ်ထားတဲ့ဒေသမှာ ဗမာလူမျိုး ဝင်ရောက်လာမှုကို တင်းကြပ်ပြီး ဟိုပန်၊ ချင်းရွှေဟော်၊ လောက်ကိုင် စတဲ့မြို့တွေမှာရှိတဲ့ ဗမာလူမျိုးတချို့ကို လားရှိုးဘက် ပြန်ပို့နေပါတယ်။
“ချင်းရွှေဟော်မှာ အလုပ်ရုံအထိ ဝင်ဖမ်းနေပြီ။ လမ်းဘေးမှာ တွေ့လည်း အကုန် ကားပေါ်ဆွဲတင်ပြီး လားရှိုးဘက် ပြန်ပို့ပါတယ်”
ကိုးကန့်ဒေသထဲ ဝင်လာရင် တရုတ်စာပါတဲ့ “ဝ”တိုင်းရုံး ထောက်ခံစာ သို့မဟုတ် တရုတ်အလုပ်ရှင် သူဌေးတွေရဲ့ ထောက်ခံချက် လိုအပ်ပြီး မူလကတည်းက ကိုးကန့်ဒေသတွင်း နေထိုင်ကြတဲ့ ဗမာလူမျိုးတွေဆိုရင် နေထိုင်ခွင့် ပြန်လုပ်လို့ရကြောင်း ကွမ်းလုံဒေသခံ အမျိုးသမီးတစ်ဦးက ရှင်းပြပါတယ်။
“နေထိုင်ခွင့်အသစ် ပြန်မလုပ်ရင် မြို့ထဲ လုံးဝ ပြန်ဝင်လို့မရတဲ့အခြေအနေ ဖြစ်နေတယ်”
ကိုးကန့်ဒေသထဲ ဗမာလူမျိုး ဝင်ရောက်လာမှုကို ၁၀၂၇ စစ်ဆင်ရေး ပထမလှိုင်းတုန်းကလည်း တင်းကြပ်တာ ရှိခဲ့ပြီး လားရှိုးမြို့ သိမ်းပိုက်ပြီးနောက်မှာတော့ ဗမာလူမျိုး ဝင်ရောက်မှုကို ပြန်လည် ခွင့်ပြုခဲ့ပါတယ်။
လားရှိုးမြိုကို စစ်ကောင်စီထံ ပြန်ပေးလိုက်ရတဲ့ ဧပြီ ၂၁ ရက်ကစပြီး အခုလို ပြန်လည် တင်းကြပ်လာတာပဲ ဖြစ်ပါတယ်။
