ပို့လဘား၊ မတ်လ ၇ ရက်၊ မုံးစီး
ရှမ်းမြောက် ကွတ်ခိုင်မြို့နယ် မုံးစီးဒေသ ပြိန်းခမ်းကျေးရွာမှာ သေဆုံးသွားတဲ့ ကချင်လွတ်မြောက်ရေးတပ်မတော် KIAတပ်သားတွေနဲ့ ဒေသခံတွေရဲ့ အသုဘစရိတ်အပြင် ထိခိုက်ဒဏ်ရာရသူတွေရဲ့ ဆေးရုံစရိတ်ကို ကိုးကန့်တပ်မတော် MNDAA က တာဝန်ယူဖြေရှင်းပေးမယ်လို့ မုံးစီးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၇ ရက် နေ့လည်ပိုင်းမှာ ပန်းယန်းခါးကျေးရွာမှာ ၎င်းသေဆုံးသူရဲ့ ရုပ်အလောင်းကို မြေမြှုပ်သဂြိုလ်မှာဖြစ်ပြီး ဒေသခံတွေက မုံးစီးကျေးရွာမှာရှိတဲ့ MNDAAရုံးကို ထပ်ပြီး ဆန္ဒလာပြဖို့ ပြင်ဆင်နေတဲ့အချိန်မှာပဲ MNDAA နဲ့ KIAတို့ရဲ့ အထက်လူကြီး အချင်းချင်းပြန်လည်ပြေလည်မှုရရှိခဲ့တယ်လို့ ဆိုပါတယ်။
“ဒီနေ့လည်း သူတို့ဆန္ဒလာပြဖို့ လူစုပြီးလုပ်နေတာ။ ကချင်ခေါင်းဆောင်က မကောင်းပါဘူးဆိုပြီး အချင်းချင်းနားလည်အောင် ညှိကြမယ်ဆိုပြီးပြောတယ်။ မုံးစီးဘက်ကိုလည်း သူတို့ကို ပေးမဖြတ်ဘူးပေါ့။ တရုတ်တွေက တားထားတာ အဲလိုပဲဆန္ဒပြမယ်ဆိုလည်း ဘာမှထူးလာမှာမဟုတ်ဘူး။ အချင်းချင်းနားလည်အောင် ဖြေရှင်းကြမယ်ဆိုပြီး ပြောတယ်။ သူတို့ လူကြီးအချင်းချင်းဖြေရှင်းလို့ ပြေလည်ကြပြီပြောတာပဲ။ ရွှေတူးတဲ့ကိစ္စကျတော့ ကျနော်မသိရသေးဘူး။ ဘယ်လိုလုပ်သွားမယ်ဆိုတာကို”
ထိခိုက်ဒဏ်ရာရသူတွေရဲ့ ဆေးကုသမှုစရိတ်ကို MNDAA က တာဝန်ယူ ဖြေရှင်းပေးမယ်လို့ ပြောထားပြီး သေဆုံးသူတွေရဲ့ အသုဘ အကူငွေအတွက်တော့ တိကျတဲ့ အရေအတွက် ဘယ်လောက်ကူညီသွားမယ်ဆိုတာကို MNDAA က မပြောသေးတာကြောင့် မသိရှိရသေးဘူးလို့ နောက်ထပ်အမျိုးသားတစ်ဦးက ပြောပြချက်အရ သိရပါတယ်။
“ကချင် CSO တွေ ဘက်ကနေပြီးတော့ လောက်ကိုင်ကိုတက်ပြီး ကိုးကန့်လူကြီးတွေနဲ့ သွားတွေ့တယ်လို့ ကြားတယ်”လို့ ပြောပါတယ်။
ပြီးခဲ့တဲ့ မတ်လ ၅ ရက်က ပြိန်းခမ်းကျေးရွာအနီးမှာရှိတဲ့ ရွှေလုပ်ကွက်ကို MNDAAက ရွှေတူးနေစဉ် KIAနဲ့ ဒေသခံတွေက ဆက်မတူးဖို့ တားဆီးရာကနေ ပစ်ခတ်မှုဖြစ်လို့ KIA တပ်သား ၂ ဦး အပါအဝင် ၆ ဦး သေဆုံးပြီး ၆ ဦး ထိခိုက်ဒဏ်ရာရရှိခဲ့တာ ဖြစ်ပါတယ်။
