မိုင်းပန်ပျော်၊ မတ်လ ၇ ရက်၊ မိုင်းယော်
ကိုးကန့်တပ်မတော်(MNDAA) ဖမ်းဆီးထားတဲ့ လားရှိုးမြို့နယ် မိုင်းယော်တိုက်နယ် လုံမွန်းကျေးရွာက အသက် ၁၅ နှစ်အရွယ်အမျိုးသမီးကို မတ်လ ၇ ရက် တစ်လပြည့်တဲ့အချိန်မှာ ပြန်လွတ်ပေးလိုက်ပြီလို့ မိသားစုဝင်တွေဆီက သိရှိရပါတယ်။
ဒီနေ့ မတ်လ ၇ ရက် နေ့လယ်ပိုင်း ၃ နာရီဝန်းကျင်မှာ အပြစ်မရှိဘူးလို့ ဆိုပြီးဘေးကင်းကင်းနဲ့ ပြန်လွတ်ပေးလိုက်ပြီလို့ မိသားစုတစ်ဦးက ရွှေဖီမြေကိုပြောပါတယ်။
“ယိင်းဟွမ်ကို သူတို့ဒီနေ့ ပြန်လွတ်လာပြီ။ သူတို့စခန်းမှာ ဒီနေ့ ၃ နာရီတုန်းက ကျနော်တို့ ယိင်းဟွမ်ကို သွားကြိုလာတာ။ သူတို့ပြောတာတော့ ဘာအပြစ်မှမရှိဘူးလို့ ပြန်လွတ်ပေးတယ်လို့ပြောတယ်”
ဖမ်းဆီးခံရတဲ့ နန်းယိင်းဟွမ်ဟာ ပြီးခဲ့တဲ့ ဖေဖော်ဝါရီ ၇ ရက်က ကိုးကန့်တပ်သားအချင်းချင်း ပစ်ခတ်မှု ဖြစ်ပွားရာကနေ တစ်ဦးသေဆုံးခဲ့တာဖြစ်ပြီး အဆိုပါ ပစ်ခတ်မှုဟာ နန်းယိင်းဟွမ်ကြောင့်ဖြစ်တယ်လို့ စွပ်စွဲဖမ်းဆီးခဲ့တာဖြစ်ပါတယ်။
ပြီးခဲ့တဲ့ ဖေဖော်ဝါရီ ၇ ရက်ကတည်းက ဒီနေ့ မတ်လ ၇ ရက်ဟာ MNDAA က နန်းယိင်းဟွမ်ကိုဖမ်းဆီးထားတာ တစ်လပြည့်တဲ့နေမှာပဲ ပြန်လွတ်ပေးလိုက်ပါတယ်။
