ယာရူစိင်၊ မတ်လ ၄ ရက်၊ သိန္နီ
ကိုးကန့်တပ် (MNDAA)ထိန်းချုပ်ထားတဲ့ သိန္နီမြို့နယ်မှာ ဆီတင်တဲ့ ကားတွေကို ကိုးကန့်တပ်က အခွန်ကောက်ခံနေပြီး ဆီတင်တဲ့ ၁၂ဘီးကား ၁စီးကို သိန်း ၁၀၀နီးပါးထိ ကောက်ခံနေတာကြောင့် ဆီကားတွေ ပိတ်မိနေတယ်လို့ ရွှေဖီမြေက စုံစမ်းသိရပါတယ်။
မနေ့ မတ်လ ၃ ရက်က စတင်ကောက်ခံနေတာဖြစ်ပြီး သိန္နီမြို့အထွက် တိုးဂိတ်မှာ ဆီတင်တဲ့ ၁၂ ဘီးကားတစ်စီးကို ကိုးကန့်တပ်က ငွေကျပ်သိန်း (၉၀)နီးပါးထိ ကောက်ခံနေကြောင်းကို မြေပြင်အခြေအနေ သိရှိသူ တစ်ဦးက ရွှေဖီမြေကို ပြောပါတယ်။
“အရင်ကဆိုရင်တော့ ၁၂ ဘီးကားဆို သိန်းဂဏန်းလောက်ပဲ ပေးရတယ်။ ဖြတ်ပိုင်းလဲ ပေးတယ်။ ဘာမှ မတင်ရင် ၁ သောင်း ၂ သောင်းလောက်ပဲ ပေးရတာ။ မနေ့ကစပြီးတော့ အလေးချိန်နဲ့ စကောက်တာပေါ့။ ကားတစ်စီးကို အမြတ်က ၅ သိန်းလောက်ပဲ မြတ်တာလေ။ သူတို့က အဲလိုမျိုး သိန်းတစ်ရာအောက် ကောက်နေပြီဆိုတော့ သူတို့ကို လုပ်ကျွေးနေရတဲ့ ပုံစံမျိုးဖြစ်နေတယ်ပေါ့။ သူတို့အခု တရုတ်ငွေနဲ့ တွက်ပြီး ကောက်နေတာ”
သိန္နီမှာ အရင်က ဆီအပြည့်တင်တဲ့ ၁၂ ဘီးကား တစ်စီးကို ငွေ ၂ သိန်းကျပ်ဝန်းကျင်သာ အခွန်ပေးဆောင်ရပေမဲ့ လက်ရှိမှာတော့ သိန်းရာချီနီးပါးအထိ အခွန်ပေးကောက်နေတာကြောင့် ဆီကားအချို့ နောက်ပြန်လှည့်သွားကြပြီလို့ ဆိုပါတယ်။
အခုလို ကိုးကန့်တပ်က စက်သုံးဆီ တင်တဲ့ ကားတွေကို အခွန် အဆမတန် ကောက်ခံနေတာဟာ သိန္နီမြို့အထက်မှာရှိတဲဘ နမ့်ခမ်းမြို့နဲ့ ကွတ်ခိုင်မြို့အပြင် ညီနောင်မဟာမိတ် ထိန်းချုပ်ထားတဲ့ ၁၀၅မိုင်မှာလဲ ဆီဈေး အဆမတန် မြှင့်တက်လာမှာကို ဒေသခံတွေက စိုးရိမ်နေကြပါတယ်။
စက်သုံးဆီတွေ စျေးမြင့်တက်လာတာကို ကာကွယ်ဖို့အတွက် ဆီကားတွေကို တအာင်းတပ်(TNLA)ကတော့ အခွန်ကင်းလွတ်ခွင့် ပေးထားပါတယ်။
