လွေးဇွန်မိုး၊ မတ်လ ၂၂ ရက်၊ ကွတ်ခိုင်
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ် မန်တုံရွာခံ ၃ ဦး ထင်း ခိုးတယ်ဆိုပြီး ကိုးကန့်တပ်- MNDAA က ဖမ်းဆီးရိုက်နှက်ခဲ့တယ်လို့ သိရပါတယ်။
ပြီးခဲ့တဲ့ မတ်လ ၁၇ ရက် မနက် ၁၀ နာရီခွဲက ဟိုကျန့်ကျေးရွာအုပ်စု မန်တုံရွာအနီးမှာ ထင်းခုတ်နေချိန် MNDAA တပ်က အင်အား ၄၀ ခန့်နဲ့ လာရောက် ဖမ်းဆီးခဲ့တာလို့ ကိုယ်တိုင်ကြုံတွေ့ခဲ့တဲ့ အမျိုးသားတစ်ဦးက ပြောပါတယ်။
“ကျနော်တို့ကို ဘာမှမေးမြန်းတာမရှိပဲနဲ့ လာဖမ်းပြီး ရိုက်နှက်တာ။ သူတို့(MNDAA) လာပြောတာတော့ ကျနော်တို့က သူတို့ရဲ့ နယ်မြေထဲ ထင်း ခိုးခုတ်တယ်ဆိုပြီးတော့ ဖမ်းသွားတာပေါ့။ ကျနော်တို့ထဲက တစ်ယောက်ဆို ခေါင်းပေါက်ပြီး သွေးထွက်တဲ့အထိ ရိုက်ခံရတာ။ ခေါင်းအပြင် ခြေထောက်၊ လက်နဲ့ ကျောကုန်းတွေမှာလည်း ရိုက်ခံရတယ်။ သူတို့ပြန်လွှတ်ပေးခဲ့တဲ့နေ့မှာပဲ ဆေးရုံ သွားတက်ရတယ်”
ဖမ်းဆီးရိုက်နှက်ခံရသူ ၃ ဦးဟာ အသက် ၅၂ နှစ်အရွယ် ဦးချာထင်၊ ၄၃ နှစ်အရွယ် ဦးခင်မောင်ဇင်နဲ့ ၂၄ နှစ်အရွယ် မိုင်းညီလှိုင်းတို့ပဲ ဖြစ်ပါတယ်။
အဲဒီမြေနေရာဟာ အရင်က မန်တုံနဲ့ တုံဆင်ကြီးရွာက ဒေသခံတွေရဲ့ ဘိုးဘွားပိုင်မြေဖြစ်ပြီး လွန်ခဲ့တဲ့ ၂၀၁၃ ခုနှစ်မှာ စစ်ကောင်စီတပ်က အတင်းအဓမ္မ သိမ်းယူခဲ့တာလို့ အထက်ပါ အမျိုးသားက ဆက်ပြောပါတယ်။
“အဲမြေနေရာက အရင်ကတည်းက ကျနော်တို့ရွာပိုင်မြေပဲ။ စစ်ကောင်စီတပ်က သစ်ပင်စိုက်မယ်ဆိုပြီး သိမ်းသွားတာ။ သိမ်းသွားပြီးတော့ ၂၀၁၅ ခုနှစ်တုန်းက ကျနော်တို့ကို စာရွက်စာတမ်းနဲ့ ပြန်လာအပ်ပေးတယ်။ ဒါပေမဲ့ အဲတုန်းက ဦးတီခွန်မြတ်တို့ ပြည်သူ့စစ်အဖွဲ့ ရှိနေတော့ ကျနော်တို့လည်း သွားမခုတ်ရဲဘူး။ အခုက စစ်ကောင်စီတပ် မရှိတော့လို့ ကျနော်တို့ ကိုယ့်မြေနေရာထဲမှာ ထင်း ပြန်သွားခုတ်တာပေါ့”
ဖမ်းဆီးရိုက်နှက်ခံရတဲ့ ဒေသခံ အမျိုးသား ၃ ဦးကိုတော့ ပြီးခဲ့တဲ့ မတ်လ ၁၈ ရက် နေ့လယ် ၂ နာရီမှာ ထင်း ခိုးခဲ့ကြောင်း ခံဝန်လက်မှတ် ထိုးခိုင်းပြီး ပြန်လွှတ်ပေးခဲ့တယ်လို့ဆိုပါတယ်။
MNDAA တပ်က အခုလို ဒေသခံကို စစ်ဆေးမေးမြန်းတာမရှိပဲ ဖမ်းဆီးရိုက်နှက်ခဲ့တဲ့အပေါ် MNDAA ဘက်က သက်ဆိုင်ရာ တာဝန်ရှိသူအနေနဲ့ တာဝန်ယူ ဖြေရှင်းပေးဖို့ ဒေသခံတွေက တောင်းဆိုထားပါတယ်။
