ရွှေဖီမြေ၊ မတ်လ ၁ ရက်၊ နမ့်ဆန်
အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာန- MoD ရဲ့ ဝန်ကြီး ဦးရည်မွန်ဟာ တအာင်းပညာရေးထီဆု ပေါက်ခဲ့ပါတယ်။
ဒီနေ့ မတ်လ ၁ ရက်မှာ (၂၁)ကြိမ်မြောက်အဖြစ် ဖွင့်လှစ်တဲ့ တအာင်းပညာရေးထီရဲ့ အမြင့်ဆုံးဆုဖြစ်တဲ့ ကျပ်သိန်း ၅၀၀ ရဲ့ ကိန်းဂဏန်းတူ တွတ်နဲ့ ၅ ရာခိုင်နှုန်းဆု ကျပ် ၂၅ သိန်း ရရှိခဲ့တာပဲ ဖြစ်ပါတယ်။
တအာင်းတပ်မတော်- TNLA ထိန်းချုပ်နယ်မြေဘက် ဖေဖော်ဝါရီလထဲ ရောက်ရှိခဲ့တဲ့ ဝန်ကြီး ဦးရည်မွန်ဟာ တအာင်းထီ ၅ အုပ် (ကျပ် ၁၀ သိန်း) ထိုးခဲ့တာဖြစ်ပြီး သိန်း ၅၀၀ ကံထူးရှင်ကတော့ ရခိုင်အမျိုးသားတစ်ဦး ဖြစ်ပါတယ်။
၂၀၂၃ ခုနှစ် ဇွန်လကစပြီး တအာင်းထီကို ဖွင့်လှစ်ခဲ့ပြီးတော့ ရရှိလာတဲ့ ရန်ပုံငွေကို တအာင်းပြည် ပညာရေးကောင်စီ- TLEC က ဖွင့်လှစ်ထားတဲ့ ကျောင်းပေါင်း ၅၀၀ နဲ့အထက်အတွက် အသုံးပြုနေပါတယ်။
လာမယ့် ၂၀၂၅-၂၀၂၆ ပညာသင်နှစ်မှာ TLEC က နမ့်ဆန်၊ မန်တုံ၊ နမ္မတူ၊ နမ့်ခမ်း၊ ကွတ်ခိုင်၊ သီပေါ၊ ကျောက်မဲ၊ နောင်ချို၊ မိုးကုတ်နဲ့ မိုးမိတ်မြို့နယ်မှာ ကျောင်းပေါင်း ၇၀၀ ကျော် ဖွင့်လှစ်သွားမှာ ဖြစ်ပါတယ်။
လာမယ့် လတွေမှာ ထီ ထိုးလိုသူနဲ့ ကံစမ်းလိုသူအနေနဲ့ ထီ Page https://www.facebook.com/share/1Bf9eDCD9d/ ထဲ ဝင်ရောက်ကာ ထီ ထိုးနိုင်ပါတယ်။
