မိုင်းပန်ပျော်၊ ဇန်နဝါရီ ၂၅ ရက်၊ ကွတ်ခိုင်
တအာင်းတပ်မတော် ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ် မိုင်းယုလေးကျေးရွာမှာ ရွှေအလွန်အကျွံ တူးဖော်မှုကြောင့် အသုံးပြုဖို့ရေ အခက်အခဲ ကြုံနေရပါတယ်။
မိုင်းယုလေးနဲ့ နမ့်ဖတ်ကာကြားမှာရှိတဲ့ နမ့်မော ရေချောင်းဟာ ဒေသခံတွေ ဟင်းသီးဟင်းရွက် ဆေးကြောဖို့၊ အဝတ်အစား လျှော်ဖို့နဲ့ ရေချိုးဖို့ အဓိက အသုံးပြုကြပြီး လက်ရှိမှာတော့ ရွှေအလွန်အကျွံ တူးဖော်မှုကြောင့် ရေ နောက်ပြီး သုံးလို့မရတဲ့အခြေအနေနဲ့ ရင်ဆိုင်နေရကြောင်း ဒေသခံအမျိုးသားတစ်ဦးက ပြောပါတယ်။
“နမ့်မောချောင်းက အဝတ်လျှော်တာတို့ ဟင်းသီးဟင်းရွက် ဆေးတာ ရေချိုးတာတွေအတွက် သုံးတာလေ။ အခု ရေနောက်တော့ အဆင်မပြေတော့ဘူး။ အိုးတွေဘာတွေ ဆေးချင်တာ အမြဲတမ်း (ရေ)နောက်တယ် ရိုးရိုးနောက်တာ မဟုတ်ဘူး တအားနောက်တာ သုံးလို့မရဘူး။ အဝတ်လျှော်လည်း မရဘူး”
နမ့်မောချောင်းမှာ ရွှေတူးဖော်နေမှုဟာ တအာင်းတပ်- TNLA ရဲ့ ခွင့်ပြုချက်နဲ့ တရုတ်ကုမ္ပဏီတချို့က တူးနေတာအပြင် မိုင်းယုလေးနဲ့ နမ့်ဖတ်ကာဒေသခံ ကိုယ်ထူကိုယ်ထ တူးတာလည်း ရှိတယ်လို့ သူက ဆက်ပြောပါတယ်။
ရွှေတူးလုပ်ငန်းကို ပြီးခဲ့တဲ့နှစ်တွေက ရပ်နားခဲ့ပြီး ၂၀၂၄ နှစ်ကုန်ပိုင်းမှ ရွှေတူးတဲ့လုပ်ငန်းကို ပြန်လည် စတင်တာ ဖြစ်ပြီးတော့ မိုင်းယုလေးရွာအထက်နားက နားဝီးဆိုတဲ့နေရာမှာ တူးတာဖြစ်တယ်လို့ ဆိုပါတယ်။
မိုင်းယုလေးဒေသခံ အမျိုးသမီးတစ်ဦးကလည်း “ရေက အခုထိ အရမ်းနောက်နေတော့ ဘာမှသုံးလို့ မရဘူး။ အခုက ရေ ရှားနေတာလေ။ တူးချင်ရင်လည်း ဒေသခံတွေ အသုံးပြုဖို့ရေ အဆင်ပြေအောင် လုပ်ပေးဖို့ တူးတဲ့သူနဲ့ တာဝန်ရှိသူကို သွားပြောကြသေးတယ်။ ဘယ်လို ပြန်လုပ်ပေးမလဲဆိုတာကိုတော့ ဘာမှမသိရသေးဘူး” ဆိုပြီး ပြောပါတယ်။
အဲဒီချောင်းရေကို မိုင်းယုလေး၊ မန်တုံ၊ မန်ပလန်း၊ ပန်လော့နဲ့ ဟိုခိုရွာခံတွေ အသုံးပြုကြတာဖြစ်ပြီး ချောင်းရေ အရင်ကလို ပြန်လည် အသုံးပြုနိုင်ဖို့အတွက် ရွှေတူးတာကို ရပ်တန့်ပေးဖို့ ဒေသခံတချို့က တောင်းဆိုနေကြပါတယ်။
ပြီးခဲ့တဲ့ နှစ်ကလည်း အဲဒီချောင်းထိပ်မှာ ရွှေတူးဖော်မှုကြောင့် ကျေးရွာ ၁၀ ရွာက ဒေသခံတွေဟာ အသုံးပြုဖို့ရေ အခက်အခဲ ကြုံရခဲ့ရဖူးပါတယ်။
