မိုင်းရူပ၊ ဧပြီ ၃၀ ရက်၊ သီပေါ
ရှမ်းမြောက် လားရှိုးနဲ့ သီပေါမြို့နယ်ကြားရှိ နမ့်မကျေးရွာမှာ ရှမ်းပြည်တိုးတက်ရေးပါတီ SSPP နဲ့ ကိုးကန့်တပ်မတော် MNDAA တို့ ပစ်ခတ်မှု ဖြစ်ပွားခဲ့ရာ SSPP တပ်တွေက နမ့်မကနေ ဆုတ်ခွာခဲ့ရပြီးနောက် ဒီနေ့ ဧပြီလ ၃၀ ရက်မှာ ၂ ဖက်တပ်တွေ စစ်ရေးတင်းမာနေတယ်လို့ သိရပါတယ်။
မနေ့ ဧပြီ ၂၉ ရက်မှာ မနက်ပိုင်း ၂ ဖက်တပ်တွေက နာရီဝက်ကြာ ပစ်ခတ်မှုဖြစ်ပွားပြီးနောက်မှာ SSPP တပ်ဘက်က ကားနဲ့ ရှမ်းတောင်ဘက်သို့ ထွက်ခွာသွားပြီးနောက် ကိုးကန့်တပ်တွေ ဟန်နားကျေးရွာအထိ ဝင်ရောက်တပ်စွဲထားတာ ဖြစ်ပါတယ်။
ဒီနေ့ ဧပြီလ ၃၀ ရက်မှာတော့ ဟန်နားကျေးရွာရှိ ကိုးကန့်တပ်တွေကို SSPP တပ်ဖက်က ဝိုင်းထားပြီး MNDAA တပ်ဖွဲ့ဝင် ၂ ဦးကို ဖမ်းဆီးထားတယ်လို့ ဒီဖြစ်စဥ်ကို သိရှိထားတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“မနေ့ ကိုးကန့်အဖွဲ့ ဟန်နားထဲအထိ ဝင်နေတယ်။ ရှမ်းအဖွဲ့တွေက ပြန်ထွက်သွားတယ်။ ဒီနေ့က ရှမ်းအဖွဲ့က ပစ်မိန့်ရတယ်လို့ ကြားတယ်။ ဒီနေ့ ရှမ်းအဖွဲ့က ဟန်နားဘက်ကို ပြန်လာပြီးတော့မှ ဟန့်နားပတ်ပတ်လည် ဝိုင်းထားတယ်။ ရှမ်းအဖွဲ့ရှိတဲ့နေရာကို သွားစုံစမ်းတဲ့ ကိုးကန့်အဖွဲ့ ၂ ယောက်ကို ရှမ်းစစ်သားတွေက ဖမ်းထားတယ်”
ဒီနေ့ နေ့လည်ပိုင်းအထိ ပစ်ခတ်တာတွေ မရှိပေမဲ့ နှစ်ဖက်တပ်အကြား စစ်ရေးတင်းမာနေပြီး အနီးအနားရှိ ဒေသခံတွေကို SSPP တပ်ဖွဲ့ဝင်တွေက ရှောင်ထားခိုင်းတယ်လို့ သူက ဆက်ပြောပါတယ်။
ဧပြီလ ၂၈ ရက်မှာ လားရှိုး နမ့်ပေါင်ရွာအနီးက နမ့်မနဲ့ ကုန်ပေါင်းကျေးရွာရှိ SSPP တပ်တွေကို ကိုးကန့်တပ်က တပ်ဆုတ်ပေးဖို့ လာရောက်ညှိနှိုင်းရာကနေ ၂ ဖက်တပ်တွေ ထိုးကြိတ်မှုဖြစ်ပွားခဲ့ပြီး မနေ့ ဧပြီ ၂၉ ရက်မှာ နမ့်မကျေးရွာထဲ ဝင်လာတဲ့ ကိုးကန့်တပ်ဖွဲ့တွေကို SSPP ဘက်က ပစ်ခတ်ခဲ့တာကြောင့် နာရီဝက်ကြာ ပစ်ခတ်မှုဖြစ်ပွားခဲ့တာ ဖြစ်ပါတယ်။
SSPP တပ်ဘက်ကတော့ ဧပြီ ၂၈ ရက်နဲ့ ၂၉ ရက်မှာ MNDAA နဲ့ ၎င်းတို့တပ်အကြား ထိတွေ့မှု ၈ နေရာ၊ နှစ်ဖက်ထိုးကြိတ်မှု ၂၄ နေရာအထိ ရှိခဲ့ပြီး ၂ ဖက်တပ်ဖွဲ့ဝင်တွေ ထိခိုက်ဒဏ်ရာရခဲ့တယ်လို့ ဒီနေ့ ဧပြီလ ၃၀ ရက် နေ့လည်ပိုင်းမှာ ထုတ်ပြန်ထားပါတယ်။
SSPP တပ်စခန်းတွေရှိတဲ့ နားနန်း၊၊ နားတော်၊ ခိုနန်းဖ၊ တင်းဟိုင်း ၊ ဆိုင်ကျော့ ၊ နားတောင့်၊ နားမခေါ်၊ ဖာစေ (သီပေါ) စတဲ့ နေရာတွေမှာ MNDAA က အင်အားဖြည့်တာတွေ ပြုလုပ်နေပြီး နှစ်ဖက်တပ် စစ်ရေးတင်းမာနေတယ်လို့လည်း ဆိုပါတယ်။
နှစ်ဖက်တပ်ရဲ့ စစ်ရေးတင်းမာမှုတွေကို ဗဟိုခေါင်းဆောင်တွေ တွေ့ဆုံဆွေးနွေးဖြေရှင်းသွားမှာ ဖြစ်တယ်လို့ SSPP က ပြောပါတယ်။
ကိုးကန့်တပ်နဲ့ ရှမ်းတပ် SSPP တို ပြဿနာဖြစ်ပွားခဲ့တဲ့ အဲဒီနမ့်မကျေးရွာမှာ ကျောက်မီးသွေးထွက်တဲ့ နေရာတစ်ခုဖြစ်ပြီး လားရှိုးမြို့ကို ကိုးကန့်တပ် ထိန်းချုပ်ထားစဥ် စစ်ကောင်စီက ဗုံးကြဲတိုက်ခိုက်ခဲ့တဲ့ နေရာလည်းဖြစ်တယ်လို့ သိရပါတယ်။
