မိုင်းအရှိုင်း၊ မေလ ၇ ရက်၊ တောင်ကြီး
ရှမ်းတောင် တောင်ကြီးမြို့မှာ စစ်ကောင်စီရဲ့ ထိပ်ပိုင်းခေါင်းဆောင်တွေ မကြာခဏ ရောက်လာပြီး မြို့တွင်းမှာ လိုင်စင်မပါတဲ့ ကားနဲ့ ဆိုင်ကယ်တွေကို စစ်ကောင်စီက ဖမ်းဆီးသိမ်းယူနေတာတွေ ဆက်တိုက် လုပ်ဆောင်နေတယ်လို့ မြို့ခံတွေက ရွှေဖီမြေကို ပြောပါတယ်။
တောင်ကြီးမြို့နေ မြို့ခံတစ်ဦးက “၄ နာရီခြားတစ်ခါ မီးလာတဲ့ တောင်ကြီးကို မဲလုံးနဲ့ မအလ ခဏခဏ လာတယ်။ သူတို့လာရင် လူတွေ့စရာတောင် မလိုဘူး။ မီးတစ်နေကုန်လာရင် သူတို့ရောက်တာပဲ” လို့ ပြောပါတယ်။
ဒါ့အပြင် စစ်တပ်က လိုင်စင်မပါတဲ့ ကားနဲ့ ဆိုင်ကယ်ကို ရှောင်တခင်စနစ်နဲ့ ဆက်တိုက် ဖမ်းဆီးသိမ်းယူတာတွေ လုပ်ဆောင်လာတယ်လို့ အမည်မဖော်လိုတဲ့ ဒေသခံတစ်ဦးက ပြောပါတယ်။
“လိုင်စင်မဲ့ကားတွေဖမ်းတာ သူ့အချိန်နဲ့သူ ရှိတယ်။ ကောက်ဖမ်းချင်တဲ့အချိန် ဖမ်းတာ။ ဒါပေမဲ့ အခုတလော တောက်လျှောက်ပဲ။ ကြည့်ကြည့်ပြီး မောင်းရတာပေါ့။ လွတ်မပေးဘူး တော်တော်များများ နောက်ခံရှိမှ အဆင်ပြေတာ”
မြို့တွင်းရှိ တက္ကသိုလ်နဲ့ မီးပွိုင့် စတဲ့နေရာမှာ လိုင်စင်မပါတဲ့ ဆိုင်ကယ်တွေကို ဖမ်းဆီးနေသလို ဆိုင်ကယ်ဦးထုပ် မဆောင်းသူတွေဟာ အနည်းဆုံး ၃ သောင်း ပေးဆောင်ရတယ်လို့ အမည်မဖော်လိုတဲ့ မြို့ခံအမျိုးသမီးတစ်ဦးက ပြောပါတယ်။
“ဖမ်းတယ်လေ အခုလည်း။ ဦးထုပ် မဆောင်းလို့ ၃ သောင်း ပေးရတာ။ ကျမမှာ ပိုက်ဆံ မပါလို့ K- Pay နဲ့ ပေးရသေးတယ်”
ရှမ်းပြည်အတွင်း ဝင်ရောက်လာကြတဲ့ ကားအကုန်လုံးနီးပါးက မှောင်ခိုလမ်းမှ ကမ်းကူးပြီး ရောက်လာတဲ့ကားတွေဖြစ်သလို ရှမ်းပြည်မှာ အရင်ကတည်းက လိုင်းစင်မဲ့ကားတွေသာ စီးခဲ့ကြပြီး ၁၀၂၇ စစ်ဆင်ရေးပြီးနောက်ပိုင်းမှ စစ်ရှောင်အများစု ရောက်ရှိချိန် အခုလို ဆက်တိုက် ဖမ်းဆီးလာတာပဲ ဖြစ်ပါတယ်။
