အိုက်ပွီး၊ မေလ ၁၄ ရက်၊ တမူး
စစ်ကိုင်းတိုင်း၊ တမူးမြို့က စစ်ကောင်စီနဲ့ ပျူစောထီးတွေဟာ ရိက္ခာတွေ ပြတ်လပ်နေတဲ့အတွက် အိန္ဒိယဘက်ခြမ်း ကျေးရွာတွေမှာ ဝယ်ယူနေကြရတယ်လို့ ဒေသခံတွေဆီက သိရပါတယ်။
တော်လှန်ရေးတပ်ဖွဲ့တွေက တမူးမြို့သိမ်းတိုက်ပွဲ ပြင်ဆင်နေတဲ့အတွက် စစ်ကောင်စီဆီ ရိက္ခာမရောက်ရအောင် ပြီးခဲ့တဲ့ ဧပြီလ ၂၀ ရက်နေ့ကစပြီး ကုန်စည်စီးဆင်းမှုကို ပိတ်ထားတာဖြစ်ပါတယ်။
ဒါကြောင့် ရိက္ခာပြတ်လပ်နေတဲ့ စစ်ကောင်စီနဲ့ ပျူစောထီးတွေဟာ အိန္ဒိယဘက်ခြမ်း ကျေးရွာတွေမှာ ကားတွေနဲ့ ရိက္ခာတွေ ဝယ်ယူတင်သွင်းနေရတာဖြစ်ပါတယ်။
“PDF တွေက လမ်းကြောင်း ပိတ်ပြီးမှ ဒီဘက် လာဝယ်ကြတာပါ။ အရင်ကတော့ မရှိဘူး။ တစ်ခါလာပြီဆိုရင် လူအင်အား ၁၀၀ လောက်နဲ့ ကား ၃ စီး၊ ၅ စီးနဲ့ တပြိုင်နက် လာကြတယ်။”လို့ ဒေသခံတစ်ဦးက ရွှေဖီမြေသို့ ပြောပါတယ်။
အဲဒီလို ရိက္ခာတွေ လာဝယ်ယူတဲ့ခါ စစ်ကောင်စီတပ်နဲ့ ပျူစောထီးတွေဟာ ယူနီဖောင်းတွေ၊ သေနတ်၊ ခဲယမ်းအပြည့်အစုံနဲ့ လာကြတာဖြစ်ပြီး အိန္ဒိယစစ်တပ်ကလည်း ခွင့်ပြုထားပါတယ်။
“စစ်သားတွေက စစ်ကားတွေ၊ ယူနီဖောင်းတွေ၊ လက်နက်ခဲယမ်းတွေနဲ့အပြည့်အစုံ ဝတ်ဆင်ပြီး လာဝယ်ကြတာပါ။ နယ်စပ်ဂိတ်က အိန္ဒိယစစ်တပ်တွေကလည်း မြင်တယ်။ ခွင့်ပြုထားတယ်။ ဘာမှမပြောဘူး။ တခါတလေ ညဘက်တွေမှာ လာဝယ်ကြတာလည်းရှိတယ်။”လို့ ဒေသခံတစ်ဦးက ရွှေဖီမြေသို့ ပြောပါတယ်။
တော်လှန်ရေးတပ်ဖွဲ့တွေရဲ့ ကုန်စည်စီးဆင်းမှု ပိတ်ထားတဲ့အတွက် တမူးမြို့မှာ အခြေခံစားသောက်ကုန်တွေ စတင်ပြတ်လပ်နေပြီ ကုန်စျေးနှုန်းတွေလည်း မြင့်တက်နေပါတယ်။
တော်လှန်ရေးတပ်ဖွဲ့တွေက တမူးမြို့သိမ်းတိုက်ပွဲ တစ်လနီးပါး ပြင်ဆင်ဆောင်ရွက်နေတယ်လို့ အသိပေးလာပေမယ့် လက်ရှိအချိန် တိုက်ပွဲဖြစ်ပွါးတာတော့ မရှိသေးပါဘူး။
ဒါပေမယ့် စစ်ကောင်စီနဲ့ ပျူစောထီးတွေက တမူးမြို့သိမ်းတိုက်ပွဲအတွက် လိုအပ်တဲ့ ခံစစ်တွေ သေချာပြင်ဆင်ရွက်နေကြသလို လုံခြုံရေးတွေလည်း တင်းကြပ်ထားပါတယ်။
