မိုင်းရူပ၊ ဒီဇင်ဘာ ၃ ရက်၊ မိုးမိတ်
တရုတ်ရဲ့ ကြားဝင်မှုနဲ့ ရှမ်းမြောက် မိုးမိတ်မြို့ကို ပြန်ရခဲ့တဲ့ စစ်ကောင်စီတပ်ဟာ မြို့ပြင်နေရာတွေအထိ တပ်စွဲထားပြီး မိုးမိတ် – တွင်းငယ်လမ်းပိုင်းကို ထိန်းချုပ်ဖို့ ကြိုးစားနေတယ်လို့ မြေပြင်အခြေအနေ သိရှိသူတချို့က ရွှေဖီမြေကို ပြောပါတယ်။
လက်ရှိ စစ်ကောင်စီတပ်ဟာ မိုးကုတ် – မိုးမိတ်လမ်းပိုင်းကို ထိန်းချုပ်ထားသလို မိုးမိတ်- တွင်းငယ်လမ်းပိုင်း မန်းကျည်းပင်ကျေးရွာအထိ ရောက်ရှိနေလာတယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
“အခု စကစရောက်နေတဲ့ မန်းကျည်းပင်းရွာအကျော်မှာ SSPP တွေ ရှိတယ်။ ပြီးတော့ KIA၊ PLA၊ ပကဖတို့ ရှိတယ်။ မန်းကျည်းပင်ကနေ ဆက်သွားရင် တွင်းငယ်ဘက် ရောက်မယ်။ မိုးမိတ် – မဘိမ်းလမ်းကတော့ KIA တွေ ရှိတယ်” လို့ ဆိုပါတယ်။
စစ်ကောင်စီတပ်ဟာ သပိတ်ကျင်းမြို့နယ် တွင်းငယ်ကျေးရွာကိုလည်း ထိန်းချုပ်ထားတာကြောင့် မိုးမိတ်ကနေ ထိုးစစ်ဆင်လာရင် မိုးမိတ်နဲ့ တွင်းငယ်ကြားမှာရှိတဲ့ တော်လှန်ရေးတပ်တွေနဲ့ တိုက်ပွဲဖြစ်ပွားနိုင်တယ်လို့လည်း သုံးသပ်မှုတွေ ရှိနေပါတယ်။
လက်ရှိ မိုးမိတ်မြို့တွင်းထဲ ဝင်ရောက်လာတဲ့ စစ်ကောင်စီတပ်ဟာ စစ်အင်အား ရာနဲ့ချီ ရှိနိုင်ပြီး အုပ်ချုပ်ရေးယန္တရားကိုတော့ လည်ပတ်နိုင်တာ မရှိသေးပါဘူး။
စစ်ကောင်စီတပ်ဟာ တရုတ်နိုင်ငံရဲ့ အကူအညီနဲ့ ပြီးခဲ့တဲ့ နိုဝင်ဘာလ ၂၉ နဲ့ ၃၀ ရက်မှာ တအာင်းတပ်မတော် TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
