ခိုင်လေး၊ မေလ ၁၅ ရက်၊ စလင်း
မကွေးတိုင်း၊ စလင်းမြို့နယ် မကျီးကုန်းရွာက စာသင်ကျောင်းနဲ့ ဘုန်းကြီးကျောင်းကို စစ်ကောင်စီတပ်က ပေါင် ၅၀၀ ဗုံးနဲ့ ကြဲချတိုက်ခိုက်ခဲ့တာကြောင့် အသက် ၆၀ ရှိတဲ့ အမျိုးသမီး ၁ ဦး ဒဏ်ရာရခဲ့ပါတယ်။
မနေ့ မေလ ၁၄ ရက် နေလယ် ၃ နာရီခွဲဝန်းကျင်မှာ စစ်ကောင်စီတပ်က တိုက်ပွဲဖြစ်ပွားခြင်းမရှိတဲ့ မကျီးကုန်းရွာက ဒေသခံတွေကို ပစ်မှတ်ထားပြီး လေကြောင်းနဲ့ နှစ်ကြိမ်လာရောက်တိုက်ခိုက်ခဲ့တာဖြစ်တယ်လို့ ဗမာ့တပ်တော် – BA မှ ပြောရေးဆိုခွင့်ရှိသူ ရဲဘော်ထွန်းက ရွှေဖီမြေကို ပြောပါတယ်။
”မကျီးကုန်းရွာ စာသင်ကျောင်းပေါ်ကိုချသွားတာဖြစ်ပါတယ်။ ဒါပေမဲ့ စာသင်ကျောင်းပေါ်မကျပါဘူး။ ကျောင်းရဲ့တောင်ဘက်ကိုကျပါတယ်။ အသက် ၆၀ ခန့်အမျိုးသမီးကြီးခြေထောက်ကိုဒဏ်ရာရသွားပါတယ်(မစိုးရိမ်ရ)။ နောက်ထပ်တစ်လုံးက ၎င်းရွာရဲ့ဘုန်းကြီးကျောင်းကိုလည်းချသွားပါတယ်။ ဒါပေမဲ့ဘုန်းကြီးတော့ထိခိုက်တာမျိုးမရှိဘူး။ ချသွားတဲ့ဗုံးကတော့ ပေါင် ၅၀၀ ဗုံးလို့သိရပါတယ်ဗျ”
စစ်ကောင်စီတပ်ဟာ အခု ရက်ပိုင်း အများပြည်သူအသုံးပြုနေတဲ့ စာသင်ကျောင်း၊ ဘာသာရေးအဆောက်အဦး အပြင် ဒေသခံတွေ နေထိုင်တဲ့ နေရာတွေကို ပစ်မှတ်ထား လေကြောင်း တိုက်ခိုက်မှု ခပ်စိပ်စိပ် ပြုလုပ်နေတာကြောင့် ဒေသခံပြည်သူတွေအနေနဲ့ ဝေဟင်သတိ အမြဲရှိဖို့ အသိပေးတိုက်တွန်းထားပါတယ်။
မေလ ၁ ရက်နေ့မှ ၁၄ ရက်နေ့ထိ စစ်ကောင်စီရဲ့ လေကြောင်းတိုက်ခိုက်မှုနဲ့ စစ်ကြောင်းထိုးပြီး ဖမ်းဆီးသတ်ဖြတ်မှုကြောင့် အပြစ်မဲ့ဒေသခံ ၆၇ ဦး သေဆုံး ခဲ့တယ်လို့ AAPP ရဲ့ ထုတ်ပြန်ချက်အရ သိရပါတယ်။
ပြီးခဲ့တဲ့ မေ ၁၃ ရက်ကလည်း စလင်းမြို့နယ်၊ ကူရင်းချောက်ရွာအုပ်စု၊ ညောင်ပင်သာရွာဘုန်းကြီးကျောင်းကို တိုက်ပွဲဖြစ်တာမရှိဘဲ စစ်ကောင်စီတပ်က ဂျက်ဖိုက်တာနဲ့ဗုံးကြဲချ တိုက်ခိုက်ခဲ့ပါသေးတယ်။
