မိုင်းရူပ၊ မေလ ၃ ရက်၊ မိုးကုတ်
တအာင်းတပ်မတော်- TNLA ထိန်းချုပ်ထားတဲ့ မန္တလေးတိုင်း မိုးကုတ်အနောက်ပိုင်းကို စစ်ကောင်စီတပ်က ဒီနေ့ မေလ ၃ ရက် ည ၁၀ နာရီဝန်းကျင်မှာ ဂျက်လေယာဥ်နဲ့ ထပ်မံ ဗုံးကြဲတိုက်ခိုက်ခဲ့ပါတယ်။
“ဂျက်နဲ့ ၂ လုံး ကြဲတာ။ ဆင်ခွာရွာဘက်မှာ ကြဲတာ။ နေရာအတိအကျတော့ မသိရသေးဘူ” လို့ မိုးကုတ်အနောက်ပိုင်းရှိ ဒေသခံတစ်ဦးက ရွှေဖီမြေကို ပြောပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် ထိခိုက်မှု ရှိမရှိကိုတော့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
ဒါ့အပြင် ဒီနေ့ည ၈ နာရီမှာ နောင်ချိုမြို့နယ် ဝါးဘိုးကုန်းရွာရဲ့ စာသင်ကျောင်းကို ဦးတည်တိုက်ခိုက်တာကြောင့် ကျောင်းသားတစ်ဦး ထိခိုက်ဒဏ်ရာ ရခဲ့တယ်လို့ သိရပါတယ်။
“အခုည နောင်ချိုမှာ ဗုံး ထပ်ကြဲတယ်။ ဝါးဘိုးကုန်း စာသင်ကျောင်း ထိခိုက်ပြီး ကလေးတစ်ယောက် ဒဏ်ရာ ရတယ်။ မစိုးရိမ်ရဘူး” လို့ နောင်ချိုမြို့ခံတစ်ဦးက ပြောပါတယ်။
ဒီနေ့မနက် ၉ နာရီကလည်း မိုးကုတ်မြို့ အနောက်ပိုင်း ကတည်းရပ်ကွက်ကို ဗုံးကြဲတိုက်ခိုက်ခဲ့လို့ ဒေသခံ အမျိုးသားတစ်ဦးသေဆုံးပြီး ၃ ဦး ထိခိုက်ဒဏ်ရာ ရရှိခဲ့ပါတယ်။
ဒါ့အပြင် မနေ့ မေလ ၂ ရက် ညနေပိုင်းမှာ မိုးကုတ်မြို့အရှေ့ပိုင်းနဲ့ အနောက်ပိုင်းကို ဗုံးကြဲတိုက်ခိုက်ခဲ့သလို မနေ့ညနေပိုင်းမှာလည်း TNLA ထိန်းချုပ်ထားတဲ့ နောင်ချိုမြို့နယ်ထဲ ဗုံးကြဲတိုက်ခိုက်ခဲ့ပါတယ်။
တရုတ်ရဲ့ ကြားဝင်စေ့စပ်မှုကြောင့် ဧပြီ ၂၈ နဲ့ ၂၉ ရက်မှာ စစ်ကောင်စီနဲ့ TNLA တို့ တရုတ်နိုင်ငံ ကူမင်းမြို့မှာ တွေ့ဆုံခဲ့ပြီးနောက် TNLA ထိန်းချုပ်ထားတဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ်ကနေ ဆုတ်ပေးဖို့ စစ်ကောင်စီရဲ့ တောင်းဆိုချက်ကို TNLA က လက်မခံတာကြောင့် စစ်တပ်က အခုလို ဆက်တိုက် ဗုံးကြဲနေတာပဲ ဖြစ်ပါတယ်။
