ရွှေဖီမြေ၊ ဧပြီ ၅ ရက်၊ မိုးကုတ်
ဒီနေ့ ဧပြီ ၅ ရက် နေ့လယ် ၂ နာရီ ၁၀ မိနစ်ခန့်မှာ တအာင်းတပ်- PSLF/TNLA ထိန်းချုပ်ထားတဲ့ မိုးကုတ်မြို့ကို စစ်ကောင်စီတပ်က ဂျက်ဖိုက်တာလေယာဉ်နဲ့ ဗုံးကြဲခဲ့တယ်လို့ ရွှေဖီမြေက စုံစမ်းသိရှိရပါတယ်။
မိုးကုတ်မြို့အနောက်ပိုင်း ပင့်ကူတောင်ခြေအနီး အနောက်ဘက်ခြမ်းက တောထဲကို ဗုံး ၂ လုံး ကြဲချတိုက်ခိုက်ခဲ့တာလို့ ဆိုပါတယ်။
ဗုံးကြဲမှုကြောင့် ထိခိုက်သေဆုံးတာတွေ မရှိဘဲ သတင်းရေးသားနေချိန်အထိတော့ မိုးကုတ်မြို့ပေါ် လေယာဉ်က ပျံဝဲနေဆဲ ဖြစ်ပါတယ်။
နိုင်ငံတစ်ဝန်း သဘာဝဘေးသင့်နေချိန် စစ်တပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစုတွေထိန်းချုပ်ဒေသကို လေကြောင်းနဲ့ တိုက်ခိုက်တာ ထိုးစစ်ဆင်တာတွေ ပြုလုပ်နေဆဲ ဖြစ်ပါတယ်။
