မိုင်းရူပ၊ ဇူလိုင် ၁၃ ရက်၊ သပိတ်ကျင်း
တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်း သပိတ်ကျင်းမြို့နယ်ထဲက ကျေးရွာတွေကိုထိုးစစ်ဆင်တိုက်ခိုက်နေတဲ့ စစ်ကောင်စီတပ်ဟာ သပိတ်ကျင်းမြို့အနီးရှိ ၄ မိုင်ရွာကို ထိန်းချုပ်နိုင်ခဲ့ပြီလို့ ရှေ့တန်းသတင်းအရင်းအမြစ်တွေက ပြောပါတယ်။
သပိတ်ကျင်းမြို့အနီးရှိ ၄ မိုင်ရွာကို စစ်ကောင်စီတပ်က မနေ့ ဇူလိုင် ၁၂ ရက်မှာ ထိန်းချုပ်နိုင်ခဲ့ပြီး တိုက်ပွဲတွေဆက်ဖြစ်နေသလို စစ်ကောင်စီတပ်ဘက်က လေကြောင်းတိုက်ခိုက်မှုတွေ ဆက်တိုက်ပြုလုပ်နေတယ်လို့ ဆိုပါတယ်။
” ၅ မိုင်၊ ၆ မိုင်၊ ၄ မိုင်က ပါသွားတာတော့ အတည်ပြုလို့ ရတယ်။ တိုက်ပွဲကလည်း နေ့တိုင်းလိုလို ဖြစ်နေတယ်။ အခြေအနေကတော့ ဆိုးတယ်” လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
၇ မိုင်ကျေးရွာမှာတော့ တအာင်းတပ်-TNLA၊ မန္တလေး PDF နဲ့ မိုးကုတ်ဗျူဟာစတဲ့ တော်လှန်ရေးတပ်တွေ ဆက်ရှိနေသလို စစ်ကောင်စီတပ်တွေလည်း တပ်စွဲထားတယ်လို့ သူက ဆက်ပြောပါတယ်။
စစ်ကောင်စီထောက်ခံတဲ့ တယ်လီဂရမ်ချန်နယ်တွေမှာလည်း ၄ မိုင်ကို စစ်ကောင်စီတပ်က ပြန်ထိန်းချုပ်နိုင်ခဲ့ကြောင်း ဓာတ်ပုံတွေနဲ့ ရေးသားဖော်ပြနေကြပါတယ်။
သပိတ်ကျင်းမြို့နယ်ရှိ စစ်ကောင်စီတပ်စခန်းတွေကို တအာင်းတပ်မတော်-TNLA၊ မန္တလေး PDF နဲ့ မိုးကုတ်ဗျူဟာစတဲ့ပူးပေါင်းတပ်တွေက တိုက်ခိုက်နေတာ ဖြစ်ပါတယ်။
သပိတ်ကျင်းမြို့ကို တော်လှန်ရေးတပ်တွေက ပြီးခဲ့တဲ့ ၂၀၂၄ ခုနှစ် သြဂုတ်လထဲမှာ တိုက်ခိုက်သိမ်းနိုင်ခဲ့တာ ဖြစ်ပါတယ်။
ဒါပေမဲ့ သပိတ်ကျင်းမြို့နယ်ထဲမှာရှိတဲ့ စစ်ကောင်စီရဲ့ တန်းမြင့်လေ့ကျင်းရေးကျောင်းအမှတ်- ၁၃၊ ၇ မိုင်နဲ့ ကျောက်ကြီးရွာတပ်စခန်းတို့ကိုတော့ သိမ်းပိုက်နိုင်ခဲ့ခြင်း မရှိပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
