မြတ်နိုး၊ မေ ၃၀၊ ဖားကန့်
ကာမိုင်းဘက်ကနေ စစ်ကြောင်းထိုးလာတဲ့ စစ်ကောင်စီတပ်ဖွဲ့ တွေ မနေ့ မေလ ၂၉ ရက်နေ့ ညနေပိုင်းမှာ ဖားကန့်ကို ရောက်ရှိသွားပြီ ဖြစ်ကြောင်း ဒေသခံတွေဆီက သိရပါတယ်။
“စစ်ကောင်စီတွေ ဖားကန့်ထဲ ဝင်ရောက်သွားပြီ။ ဖားကန့် တပ်မ ၃၃ ထဲ စစ်ကောင်စီ တပ်ဖွဲ့တွေ မနေ့ မေလ ၂၉ ရက်နေ့ ညန ၂ နာရီကျော်၊ ၃ နာရီခန့်က အားလုံး ဝင်ရောက်သွားပြီ” လို့ ဒေသခံ တစ်ဦးက ပြောပါတယ်။
ဖားကန့်ဘက် စစ်ကောင်စီတွေ ဝင်ရောက်သွားနိုင်တယ် ဆိုပေမယ့် လမ်းတလျှောက် တိုက်ခိုက်ခံရလို့ ကျန်ရှိနေတဲ့ စစ်ကောင်စီတွေသာ ဖားကန့်ထဲ ဝင်ရောက်သွားနိုင်တာလို့ သူက ပြောပါတယ်။
စစ်ကောင်စီတပ်တွေ လုံးခင်းထဲဝင်လာချိန် လုံးခင်း ဒေသခံတွေကို လူသားဒိုင်းအဖြစ်ခေါ်ဆောင်သွားခံရပြီး တိုက်ပွဲလည်း ဖြစ်ပွားခဲ့တာကြောင့် အဲဒီ ဒေသခံတွေထဲ ထိခိုက်ဒဏ်ရာရရှိသူတွေ ရှိသလို စစ်ကောင်စီဘက်ကလည်း ဒေသခံ ၅ ဦးထက်မနည်း ပစ်သတ်ခဲ့တာရှိကြောင်း ဒေသခံတွေဆီက သိရပါတယ်။
“မေလ ၂၉ လုံးခင်းရွှေမှော် တည်းခိုခန်းမှာ တည်းနေတဲ့ ဗမာကောင်လေးတစ်ယောက် ကားလမ်းမှာ စစ်ကောင်စီတွေ ဖြတ်လာတာကို ပြတင်းပေါက်ကနေ လှမ်းကြည့်လိုက်တာ စစ်ကောင်စီ တပ်ဖွဲ့တွေ ပစ်လိုက်တာ လည်ပင်းမှာ ကွက်တိ။ သေဆုံးသွားတယ်” လို့ ဒေသခံ အမျိုးသား တစ်ဦးက ပြောပါတယ်။
လုံးခင်း တိုက်ပွဲအတွင်း ပြည်သူတွေရဲ့ ရုပ်အလောင်း ၄ လောင်းလည်း တွေ့ရှိခဲ့ကြောင်း ဒေသခံ ပရဟိတ တွေဆီက သိရပါတယ်။
စစ်ကောင်စီ တပ်ဖွဲ့ အင်အား ၆၀၀ ခန့် ပြီးခဲ့တဲ့ ဧပြီ လကုန်ခန့်ကစ ကားမိုင်းဘက်ကနေ ဖားကန့်ဘက် စစ်ကြောင်းချီလာခဲ့တာဖြစ်ပြီး ပြီးခဲ့တဲ့ ၃ ရက်ခန့်က စစ်ကောင်စီ စစ်ကြောင်းတွေ လုံးခင်း လယ်ပြင် ယမ်းချက်စက်ရုံထဲ အင်အား ၁၀၀ ကျော်၊ ၂၀၀ ခန့် ရောက်ရှိလာကာ မေလ ၂၈ ရက်နေ့ကစ လုံးခင်းကနေ ဖားကန့်ဘက်သွားနိုင်ဖို့ လှုပ်ရှားရာကတိုက်ပွဲ စဖြစ်ပွားခဲ့တာ ဖြစ်ပါတယ်။
စစ်ကောင်စီရဲ့ ဝါဒဖြန့် တယ်လီဂရမ်တွေမှာတော့ ဖားကန့်ဒေသကို ရအောင်ပြန်လည် သိမ်းယူမှာဖြစ်ကြောင်း ဝါဒဖြန့် ရေးသားထားတာကို တွေ့ရလို့ ဒေသခံတွေက တိုက်ပွဲ ပြင်းပြင်းထန်ထန် ဖြစ်လာမှာကို စိုးရိမ်နေကြတယ်လို့ ဆိုပါတယ်။
