ရွှေဖီမြေ၊ မေလ ၁၃ ရက်
စစ်ကိုင်းတိုင်း၊ ဒီပဲယင်းမြို့နယ် အိုးထိမ်းကွင်းကျေးရွာကို စစ်ကောင်စီတပ်က ဗုံးကြဲတိုက်ခိုက်မှုတွေ မလုပ်ခဲ့ဘူးလို့ စစ်ကောင်စီရဲ့ထိန်းချုပ်မှုအောက်မှာ ရပ်တည်နေတဲ့ MRTVရုပ်သံ သတင်းဌာနက သတင်းထုတ်ပြန်ပါတယ်။
အမျိုးသားညီညွတ်ရေးအစိုးရ- NUGက ဖွင့်လှစ်ထားတဲ့ ကြားကာလစာသင်ကျောင်းကို မနေ့ မေလ ၁၂ ရက် မနက် ၁၀ ဝန်းကျင်မှာ စစ်ကောင်စီတပ်က လေကြောင်းနဲ့ ပေါင် ၅၀၀ ဗုံးသီးနဲ့ ကြဲချခဲ့တာကြောင့် ကျောင်းသူကျောင်းသား အနည်းဆုံး ၂၀ ဦး နဲ့ ဆရာမ ၂ ဦး သေဆုံးခဲ့တယ်လို့ ဒေသခံတွေက အခိုင်အမာပြောဆိုနေချိန်မှာ စစ်ကောင်စီတပ်က အခုလို ငြင်းဆိုလိုက်တာဖြစ်ပါတယ်။
စစ်ကောင်စီတပ်အနေနဲ့ ကျောင်းသူကျောင်းသားတွေရဲ့ အနာဂါတ်ကို ရှေ့ရှုတာကို ပြည်သူတွေ အသိဆုံးဖြစ်ပြီး လက်နက်ကိုင်တပ်တွေကသာ မထောက်ခံသူဖြစ်တဲ့ ပြည်သူတွေနေထိုင်တဲ့နေရာကို တိုက်ခိုက်နေတာလို့ စွတ်စွဲထားပါတယ်။
မနေ့ ၁၂ ရက် ညပိုင်းမှာလည်း တိုက်ပွဲဖြစ်ပွားခြင်းမရှိဘဲ တအာင်းတပ်- TNLA ထိန်းချုပ်ထားတဲ့ မိုင်းငေါ့မြို့စာသင်ကျောင်းအနီးနဲ့ မန်တုံမြို့တွင်းထဲကို စစ်ကောင်စီတပ်က ဗုံးကြဲတိုက်ခိုက်မှုတွေ လုပ်ဆောင်ခဲ့ပြီး မန်တုံဒေသခံ တစ်ဦးသေဆုံးခဲ့ရပြီး ၆ ဦးဒဏ်ရာရရှိခဲ့ပါတယ်။
စာသင်ကြားနေတဲ့လူ ၂၀ ကျော်ကို သေဆုံးစေခဲ့တဲ့ စစ်ကောင်စီတပ်ရဲ့ ဗုံးကြဲတိုက်ခိုက်မှုအပြီးမှာပဲ ထိုင်းဟာ မြန်မာ့ငြိမ်းချမ်းအတွက် ဦးဆောင်ဆောင်ရွက်ချိန်တန်ပြီလို့ ထိုင်းလွှတ်တော်အမတ် မစ္စတာ ကန်နဝီက တိုက်တွန်းထားပါတယ်။
