ရွှေဖီမြေ၊ မတ်လ ၂၉ ရက်
မန္တလေးတိုင်းမှာ ငလျင်လှုပ်ခတ်မှုကြောင့် သေဆုံးသူ ၇၀၀ နီးပါးရှိပြီး ဒဏ်ရာရသူ ၁,၆၄၀ ဦးနဲ့ ပျောက်ဆုံးနေသူ ၆၈ ဦး ရှိတယ်လို့ စစ်ကောင်စီက ဒီနေ့ မတ်လ ၂၉ ရက်မှာ ထုတ်ပြန်လာပါတယ်။
ငလျင်ဒဏ်ကြောင့် မန္တလေးမြို့တစ်မြို့လုံးနီးပါး အဆောက်အဦး ပျက်စီးဆုံးရှုံးခဲ့ရပြီး အဆောက်အဦး အပျက်အစီးတွေကြားမှာ ပိတ်မိနေသူလည်း အများစု ရှိနေသေးတယ်လို့ ပြောပါတယ်။
ငလျင်ဒဏ်ကြောင့် ထိခိုက်ပျက်စီးခဲ့တဲ့ မန္တလေးမြို့အခြေအနေကို စစ်ခေါင်းဆောင် မင်းအောင်လှိုင်က ဒီနေ့မနက်ပိုင်းမှာ ရဟတ်ယာဉ်နဲ့ လှည့်လည် ကြည့်ရှုစစ်ဆေးနေပါတယ်။
ငလျင်ဘေးအတွက် အမေရိကန်က အကူအညီ ပေးသွားမယ်လို့ သမ္မတ ဒေါ်နယ်ထရမ့်က ပြောကြားထားပြီး တရုတ်နိုင်ငံ ယူနန်ပြည်နယ်က ကယ်ဆယ်ရေးနဲ့ ဆေးကုသမှုအဖွဲ့တစ်ခုက ငလျင်သင့်သူအတွက် အကူအညီပေးဖို့ ဒီနေ့ မတ်လ ၂၉ရက် မနက်ပိုင်းက မြန်မာဘက် ရောက်ရှိလာတယ်လို့ သိရပါတယ်။
ငလျင်ကြောင့် ထိခိုက်ပျက်စီးမှုများတဲ့ မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ ရှမ်းပြည်နယ် အရှေ့မြောက်ပိုင်းနဲ့ နေပြည်တော်ကောင်စီနယ်မြေကို စစ်ကောင်စီရဲ့ အမျိုးသား သဘာ၀ ဘေးအန္တရာယ်ဆိုင်ရာ စီမံခန့်ခွဲမှု ကော်မတီက အရေးပေါ်အခြေအနေ ကြေညာခဲ့ပါတယ်။
မနေ့ မတ်လ ၂၈ ရက် နေ့လယ် ၁၂ နာရီ ၅၁ မိနစ်မှာ မန္တလေးမြို့ အရှေ့မြောက်ဘက် ၂၀ ကီလိုမီတာခန့်အကွာကို ဗဟိုပြုပြီး ပြင်းအား ၇ ဒသမ ၇ ရှိတဲ့ မြေငလျင် လှုပ်ခတ်ခဲ့တာပဲ ဖြစ်ပါတယ်။
