ရွှေဖီမြေ၊ ဧပြီ ၁ ရက်
တော်လှန်ရေးတပ်ဖွဲ့တွေရဲ့ ယာယီ အပစ်ရပ် ကမ်းလှမ်းချက်ကို စစ်ကောင်စီဘက်က ပယ်ချလိုက်ပြီး သင်္ကြန်ပွဲတော်ကို ကျင်းပမယ်ဆိုပြီး ထုတ်ပြန်လာပါတယ်။
စစ်ကောင်စီ လက်အောက်ခံ ပြန်ကြားရေးဝန်ကြီးဌာနက ဒီနေ့ ဧပြီ ၁ ရက် ည ၈ နာရီခွဲ သတင်းထုတ်ပြန်ချက်ထဲ “တစ်နိုင်ငံလုံး ဝမ်းနည်းကြေကွဲနေရသောကာလ ဖြစ်ပါသဖြင့် ယခုနှစ် မြန်မာ့ရိုးရာသင်္ကြန်ကို အပျော်အပါး သီဆိုကခုန်မှုများ မပါဝင်ဘဲ ရိုးရာယဉ်ကျေးမှုနှင့်အညီ အေးချမ်းသာယာသော သင်္ကြန်အဖြစ် ကျင်းပသွားမည်ဖြစ်ကြောင်း သိရှိရသည်”ဆိုပြီး သတင်းထုတ်ပြန်လာတာပါ။
အလားတူ စစ်ခေါင်းဆောင်က “အချို့သော တိုင်းရင်းသား လက်နက်ကိုင်အဖွဲ့များအနေဖြင့် လက်ရှိ အခြေအနေမှာ တိုက်ပွဲ ဖော်ဆောင်ခြင်းများ မရှိသော်လည်း တိုက်ခိုက်ခြင်းများ လုပ်ဆောင်ရန်အတွက် စုဖွဲ့ခြင်း၊ လေ့ကျင့်ပြင်ဆင်ခြင်းများ လုပ်ဆောင်နေကြတာကို မိမိတို့အနေဖြင့် သိရှိပြီးဖြစ်ပြီး အဲ့လိုဆောင်ရွက်နေခြင်းဟာ တိုက်ခိုက်ခြင်းပင်ဖြစ်တဲ့အတွက် တပ်မတော်အနေဖြင့် လိုအပ်တဲ့ကာကွယ်ရေးဆိုင်ရာ လုပ်ငန်းများကို ဆက်လက် ဆောင်ရွက်သွားမှာ ဖြစ်ပါကြောင်း”ဆိုပြီး နေပြည်တော်မှာ ဒီနေ့ ပြုလုပ်တဲ့ ငလျင်ပြန်လည်ထူထောင်ရေး အလှူငွေပေးပွဲမှာ အခုလို ပြောကြားခဲ့ကြောင်း Myanmar Now သတင်းဌာနက ရေးသားထားပါတယ်။
ငလျင်ဘေးသင့်သူတွေကို ကယ်ဆယ်ရေး လုပ်ဖို့အတွက် NUG က ၂ ပတ်နဲ့ ညီနောင်မဟာမိတ် ၃ ဖွဲ့က ဧပြီလ တစ်လလုံး တစ်ဖက်သတ် အပစ်ရပ်ကြောင်း ကြေညာထားသလို ညီနောင်မဟာမိတ်ထဲက TNLA နဲ့ MNDAA ဟာ ကျင်းပဖို့ စီစဉ်ထားတဲ့ သင်္ကြန်ပွဲတော် ဖျက်သိမ်းလိုက်ကြောင်း ကြေညာထားတာပါ။
