မိုင်းရူပ၊ ဇူလိုင် ၁၈ ရက်
တအာင်းမတော် TNLA၊ ဓနုပြည်သူ့လွတ်မြောက်ရေးတပ်တော် DPLA နဲ့ မန္တလေး PDF တို့ တပ်ဖွဲ့ဝင် ၁၅ ဦး အလင်းဝင်လာကြောင်း စစ်ကောင်စီဝါဒဖြန့် မီဒီယာတွေမှာ မနေ့ ဇူလိုင် ၁၇ ရက် ညပိုင်းမှာ ထုတ်ပြန်ထားပါတယ်။
အလင်းဝင်လာသူတွေထဲမှာ TNLA တပ်ဖွဲ့ဝင် ၄ ဦး၊ DPLA တပ်ဖွဲ့ဝင် ၅ ဦးနဲ့ မန္တလေး PDF တပ်ဖွဲ့ဝင် ၅ ဦးပါဝင်ပြီး အလင်းဝင်လာသူတွေကို မိဘတွေထံ ပြန်လည်အပ်နှံပေးခဲ့တယ်လို့ ဆိုပါတယ်။
DPLA ရဲ့ တာဝန်ရှိသူတစ်ဦးကတော့ DPLA တပ်ဖွဲ့ဝင်တွေဟာ စစ်ကောင်စီထံ အလင်းဝင်တာမရှိဘဲ ဒီရက်ပိုင်းအတွင်း ခွင့်ပြန်တဲ့ DPLA တပ်ဖွဲ့ဝင်တချို့ စစ်ကောင်စီတပ်ရဲ့ ဖမ်းဆီးတာခံခဲ့ရတယ်လို့ ရွှေဖီမြေကို ပြောပါတယ်။
“မိဘတွေကို တွေ့ချင်လို့ ခွင့်ပေးပြန်တာ။ စကစရဲ့ ဖမ်းဆီးတာ ခံရတာ။ သူတို့ လက်ထဲရောက်တော့ အလင်းဝင်တယ်ဆိုပြီး ဝါဒါဖြန့်တာ” လို့ ဆိုပါတယ်။
စစ်ကောင်စီတပ်ဟာ TNLA နဲ့ တော်လှန်ရေးတပ်ဖွဲ့ဝင်တွေက ၎င်းတို့ထံ အလင်းဝင်လာတယ်လို့ ထုတ်ပြန်ထားပေမဲ့ ၎င်းတို့ရဲ့ မျက်နှာကိုတော့ ဖော်ပြထားတာ မရှိပါဘူး။
စစ်ကောင်စီကို တော်လှန်တိုက်ခိုက်နေတဲ့ ပြည်သူ့ကာကွယ်ရေးတပ် PDF နဲ့ တိုင်းရင်းသားလက်နက်ကိုင်အဖွဲ့တွေကို လက်နက်ကိုင်လမ်းစဥ်ကို စွန့်လွှတ်ပြီး စစ်ကောင်စီထံ ဘက်ပြောင်းခိုလှုံဖို့ မကြာခဏ ဖိတ်ခေါ်နေတာလည်း ရှိပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
