ပျားကြီး၊ မတ် ၃ရက်၊ မြိုင်
မကွေးတိုင်းမြောက်ခြမ်း၊ ပခုက္ကူခရိုင်၊ မြိုင်နဲ့ ပေါက်မြို့နယ်တွေမှာ စစ်ကောင်စီက လေကြောင်းတိုက်ခိုက်မှုပြုလုပ်ခဲ့တာကြောင့် ပြည်သူ ၁၅ ဦးထက်မနည်း သေဆုံးခဲ့တယ်လို့ ဒေသခံတွေက ပြောပါတယ်။
ဒီနေ့ မတ်လ ၃ ရက် မနက်အစောပိုင်း ၁ နာရီဝန်းကျင်ကစပြီး ရေနံမှော်တွေတည်ရှိရာ မြိုင်နဲ့ပေါက်မြို့နယ်အစပ်က ကျေးရွာတွေကို လေကြောင်းတိုက်ခိုက်မှု ၁၀ ကြိမ်နီးပါးပြုလုပ်ခဲ့တာဖြစ်ပါတယ်။
“ရေနံမှော်တွေဖက်ကို အဓိက ကြဲသွားတာပေါ့။ ၉ ရွာ၊ ၁၀ ရွာလောက်ရှိမယ်။ လူတွေရော တိရိစ္ဆာန်တွေရော အတော်များများသေကြတယ်။ Paramoter နဲ့ ကင်းထောက်တာတွေရှိနေတော့ ဘယ်သူမှအပြင်မထွက်ရဲကြသေးဘူး။ ဗုံးခိုကျင်းတွေထဲမှာပဲနေ နေရတာ”လို့ ဒေသခံအမျိုးသားကြီးတစ်ဦးကပြောပါတယ်။
မြိုင်မြို့နယ်က ဆိတ်ချေး၊ ဂျုတ်ကုန်း၊ ဘောင့်ဘင်၊ ညောင်ကုန်း၊ တောရွာ၊ ဆူးဝင်းကျေးရွာတွေနဲ့ ပေါက်မြို့နယ်က လက်ပံတို၊ သရက်ကန်နဲ့ ဆုံကုန်းကျေးရွာတွေကို Y12 အမျိုးအစားဗုံးကြဲလေယာဥ်နဲ့ ဂျက်ဖိုက်တာတွေ အသုံးပြုပြီးတိုက်ခိုက်ခဲ့တာဖြစ်ပါတယ်။
လေကြောင်းတိုက်ခိုက်မှုအတွင်းမှာ အမျိုးသမီးတွေအပါအဝင် ၁၅ ဦး သေဆုံးခဲ့ပြီး လူပေါင်း ၂၀ ကျော်ထိခိုက်ဒဏ်ရာရရှိခဲ့တယ်လို့ ဒေသခံတွေကဆိုပါတယ်။
စစ်ကောင်စီဟာ အခုနောက်ပိုင်းမှာ မြိုင်နဲ့ပေါက်မြို့နယ်က ရေနံမြေတွေကို အဓိကပစ်မှတ်ထားပြီး လေကြောင်းတိုက်ခိုက်မှုတွေ ပြုလုပ်နေတာဖြစ်ပြီး ပြီးခဲ့တဲ့ ဖေဖော်ဝါရီလ ၂၅ ရက်နေ့က ကျောက်ခွက်ရေနံမှော်ဒေသ၊ ဆုံကုန်းကျေးရွာဘုန်းတော်ကြီးကျောင်းမှာ မင်္ဂလာဧည့်ခံပွဲပြုလုပ်နေချိန် လေကြောင်းတိုက်ခိုက်မှုပြုလုပ်ခဲ့တာကြောင့် လူပေါင်း ၁၀ ဦးကျော် သေဆုံးခဲ့ရပါတယ်။
