လွေးလာဝ်ဇာရ်၊ စက်တင်ဘာ ၂၁ ရက်၊ မိုးကုတ်
တအာင်းတပ်မတော် PSLF/TNLA ထိန်းချုပ်တဲ့ မိုးကုတ်နဲ့ ကျောက်မဲမြို့ကို စစ်ကောင်စီတပ်က လေယာဉ်နဲ့ ထပ်မံဗုံးထပ်ကြဲခဲ့တယ်လို့ ဒေသခံတွေဆီက သိရပါတယ်။
ဒီနေ့ စက်တင်ဘာလ ၂၁ ရက် နေ့လယ် ၂ နာရီခွဲဝန်းကျင်မှာ မိုးကုတ်မြို့ အနောက်ပိုင်းကို ဂျက်ဖိုက်တာတစ်စီးနဲ့ လာရောက်ကြဲချခဲ့ပြီး လူထိခိုက်မှုတော့ မရှိဘူးလို့ ဖြစ်စဉ်သိရှိသူ တစ်ဦးက ပြောပါတယ်။
ဖြစ်စဉ်သိရှိသူတစ်ဦးက “ကြက်ခြံနေရာမှာဘဲ လာကြဲတာ။ လူထိခိုက်မှု မရှိဘူး။ ကြက်တွေလည်း မရှိဘူး။ ကြက်ခြံဆိုပေမဲ့ ကြက်လည်းမမွေးတာကြားပြီ” လို့ ပြောပါတယ်။
အလားတူ မနေ့ စက်တင်ဘာ ၂၀ ရက် နေ့လယ် ၁ နာရီခွဲဝန်းကျင်မှာလည်း ကျောက်မဲမြို့ ရပ်ကွက် ၂ မှာ စစ်ကောင်စီတပ်က ပေါင် ၂၅၀ ဗုံး ၂ လုံး လာရောက်ကြဲချ တိုက်ခိုက်ခဲ့ပြီး လူထိခိုက်မှုတော့ မရှိဘူးလို့ သိရပါတယ်။
အလားတူ ပြီးခဲ့တဲ့ စက်တင်ဘာလ ၉ ရက်မှာ ကျောက်မဲမြို့နယ် နမ့်ဟူးတောင်းအုပ်စု လွယ်ခေါ်ရွာမှာလည်း စစ်ကောင်စီတပ်က လေယာဉ်နဲ့ ပေါင် ၂၅၀ ဗုံး ၃ လုံးနဲ့ ဒရုန်း ဗုံး ၂ လုံး လာရောက်ကြဲချတိုက်ခိုက်ခဲ့ပြီး ဒေသခံတွေရဲ့ လယ်ယာတွေ ထိမှန်ပျက်စီးသွားခဲ့တယ်လို့ TNLA က မနေ့ စက်တင်ဘာ ၂၀ ရက်မှာ သတင်းထုတ်ပြန်ထားပါတယ်။
ဒါကြောင့် ပြည်သူလူထုတွေအနေနဲ့ စစ်ကောင်စီရဲ့ ဗုံးကြဲတိုက်ခိုက်မှုတွေကို ရှောင်ရှားနိုင်ရန် အတွက် စစ်ရေးသတိအမြဲရှိရန် လိုအပ်ပြီး လေကြောင်းရန်ကနေ ကာကွယ်ရေးဆိုင်ရာ နည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့ ထုတ်ပြန်ချက်မှာ ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
