မြတ်နိုး၊ ဧပြီ ၂၅၊ ဖားကန့်
စစ်ကောင်စီဘက်က ယာယီပစ်ခတ်တိုက်ခိုက်မှု ရပ်စဲရေးကာလ တိုးမြှင့်ပြီးနောက် စစ်ကောင်စီ တပ်ဖွဲ့က ဖားကန့်လမ်းဘက် ထိုးစစ်ဆင်လာကြောင်း ရှေ့တန်း သတင်းရင်းမြစ်တွေဆီက သိရပါတယ်။
“ကားမိုင်းမှာ ရောက်နေတဲ့ စစ်ကောင်စီ တပ်ဖွဲ့တွေ ဖားကန့် လမ်းဘက် စတင်လှုပ်ရှား စစ်ကြောင်းထိုး နေပြီ။” လို့ ရှေ့တန်း သတင်းရင်းမြစ် တစ်ဦးက ရွှေဖီမြေကို ပြောပါတယ်။
လက်ရှိ စစ်ကောင်စီနဲ့ ပြည်သူ့စစ် ပူးပေါင်းတပ်ဖွဲ့က ဖားကန့်ဒေသကို ထိန်းချုပ်နိုင်ဖို့ စီစဉ်နေပြီး စစ်
အင်အား ရာချီသုံးကာ ဖားကန့်လမ်းဘက် စစ်ကြောင်းထိုးလာတာကြောင့် ဒီနေ့ ဧပြီလ ၂၅ ရက်နေ့မှာလည်း တိုက်ပွဲ ဖြစ်နေတယ်လို့ ဆိုပါတယ်။
စစ်ကောင်စီ ပစ်ခတ်ရပ်စဲရေးကာလ တိုးမြှင့်ကြောင်း ကြေငြာတဲ့ ဧပြီလ ၂၂ ရက်နေ့မှာ မြစ်ကြီးနား၊ နမ္မတီး ဘက်ကို စစ်ကောင်စီ ကား ၆ စီးထဲက အင်အား ၂၀၀ခန့် စစ်အင်အားချထားခဲ့တယ်လို့ ဆိုပါတယ်။
မနေ့ ဧပြီလ ၂၄ ရက်နေ့ ညနေပိုင်းက ဖားကန့်လမ်း မအူပင် ရေကာတာမှာ အဲစစ်ကြောင်းထိုးလာတဲ့ စစ်ကောင်စီ တပ်ဖွဲ့ကို KIA ပူးပေါင်း တပ်ဖွဲ့က ကြားဖြတ် တိုက်ခိုက်ရာက တိုက်ပွဲ ဖြစ်ပွားခဲ့ကြောင်း ရှေ့တန်းနဲ့ နီးစပ်တဲ့ သတင်းရင်းမြစ် တယောက်က ပြောပါတယ်။
“ဖားကန့်လမ်းတလျှောက်က ဒေသခံပြည်သူတွေ အားလုံး တိမ်းရှောင်နေရတယ်” လို့ သူက ပြောပါတယ်။
စစ်ရေးတင်းမာမှုကြောင့် ဧပြီလ ၂၄ ရက်နေ့ကစ မြစ်ကြီးနား – ကားမိုင်း – နန့်ယား – ဖားကန့် လမ်း အတက်၊ အဆင်းကို KIA နဲ့ ပူးပေါင်း တပ်ဖွဲ့ ဘက်က ယာယီပိတ်ထားတယ်လို့ ဆိုပါတယ်။
“ဒီနေ့ မနက် ၁၀ နာရီ ဝန်းကျင်က ဖားကန့် လမ်းဘက်က နန့်ယန်း၊ ကပ်မှော်၊ ဆိုင်းဖရာ၊ ခရိုင်ရွန်၊ ကပ်နွယ် ရွာတွေဘက်က ဒေသခံ စစ်ဘေးရှောင် ပြည်သူတွေကို လာကြိုတဲ့ ကားတွေကို စစ်ကောင်စီ တပ်ဘက်က တားထားတယ်” လို့ ဒေသခံ တစ်ဦးက ပြောပါတယ်။
အဲဒီလို တားမြစ်ထားတာကြောင့် စစ်ရှောင်တွေကို သွားကြိုခွင့်ပြုဖို့ ညှိနှိုင်းနေတာ ရှိတယ်လို့ သူက ပြောပါတယ်။
စစ်ကောင်စီက အပစ်ခတ်ရပ်စဲကြေငြာ ဟန်ဆောင်ပြီး စစ်အင်အား ဖြည့်တင်းနေဆဲ ဖြစ်တယ်လို့လည်း အဲဖားကန့်က ရှေ့တန်း သတင်းရင်းမြစ်တွေက ပြောပါတယ်။
ဧပြီ ၂၃ ရက်မှ ၃၀ ရက် ယာယီ ပစ်ခတ် တိုက်ခိုက်မှု ရပ်စဲရေးကာလအဖြစ် ထပ်မံတိုးမြှင့်လိုက်ကြောင်း စစ်ကောင်စီဘက်က ဧပြီလ ၂၂ ရက်နေ့က ထုတ်ပြန်ထားတာ ဖြစ်ပါတယ်။
