ရွှေဖီမြေ၊ မေလ ၆ ရက်
စစ်ကောင်စီတပ်က ဒီနေ့ မေလ ၆ ရက်ကနေ မေလ ၃၁ ရက်အထိ အပစ်ရပ်ကာလ ၁ လ ထပ်တိုးထားကြောင်း စစ်ကောင်စီလက်အောက်ခံ မီဒီယာတွေက ဒီနေ့ မေလ ၆ ရက်မှာ ရေးသားဖော်ပြလာကြပါတယ်။
ငလျင်ဘေးသင့်ဒေသမှာ ပြန်လည်ထူထောင်ရေးနဲ့ ကူညီကယ်ဆယ်ရေးလုပ်ငန်းတွေ လုပ်ဆောင်နိုင်ဖို့အတွက် ယာယီ အပစ်ရပ်ကာလ ထပ်တိုးတာဖြစ်တယ်လို့ ဆိုပါတယ်။
ပြီးခဲ့တဲ့ ဧပြီ ၂ ရက်ကနေ ၃၀ ရက်အထိ စစ်တပ်က အပစ်ရပ် ကြေညာထားပေမဲ့ ရှမ်းမြောက်အပါအဝင် တော်လှန်ရေး အင်အားစုတွေ ထိန်းချုပ်ထားတဲ့ဒေသမှာ လေကြောင်းနဲ့ ဗုံးကြဲတိုက်ခိုက်တာတွေ လုပ်နေပါတယ်။
စစ်တပ်က အပစ်ရပ်ထားတဲ့ ဧပြီလအတွင်း ကရင်အမျိုးသားအစည်းအရုံး- KNU ထိန်းချုပ်နယ်မြေ မူတြော်(ဖာဖွန်)ခရိုင်ထဲ KNU တပ်မဟာ(၅)နဲ့ စစ်ကောင်စီတပ်တို့အကြား တိုက်ပွဲ ၁၃၉ ကြိမ် ဖြစ်ပွားခဲ့တယ်လို့ KNU က မနေ့ မေလ ၅ ရက်မှာ ထုတ်ပြန်ထားပါတယ်။
ဒါ့အပြင် အပစ်ရပ်ကာလအတွင်း စစ်တပ်ရဲ့ လေကြောင်းနဲ့ လက်နက်ကြီး ပစ်ခတ်တိုက်ခိုက်မှုကြောင့် KNU ထိန်းချုပ်ဒေသက သံဃာ ၄ ပါးအပါအဝင် အရပ်သား ၁၉ ဦး သေဆုံးခဲ့ကြောင်း KNU က ပြီးခဲ့တဲ့ ဧပြီ ၂၆ ရက်မှာ ထုတ်ပြန်ထားပါတယ်။
စစ်တပ်က အပစ်ရပ် ကြေညာထားတဲ့ ဧပြီ ၁ လလုံးမှာ လေကြောင်း တိုက်ခိုက်မှု ၂၄၄ ကြိမ် ပြုလုပ်ခဲ့ပြီး အဲဒီတိုက်ခိုက်မှုကြောင့် အရပ်သား ၂၀၁ ဦး သေဆုံးခဲ့တဲ့အပြင် ၃၀၀ ကျော် ထိခိုက်ဒဏ်ရာ ရခဲ့တယ်လို့ ဉာဏ်လင်းသစ် သုတေသနအဖွဲ့ရဲ့ စာရင်းအရ သိရပါတယ်။
ညီနောင်မဟာမိတ် ၃ ဖွဲ့ဖြစ်တဲ့ တအာင်းတပ်- TNLA၊ ကိုးကန့်တပ်- MNDAA နဲ့ အာရက္ခတပ်တော်- AA တို့ကလည်း မေလ ၁ ရက်ကနေ ၃၁ ရက်အထိ တစ်ဖက်သတ် အပစ်ရပ်ကြောင်း ထုတ်ပြန်ထားပါတယ်။
