မိုင်းရူပ၊ အောက်တိုဘာလ ၁၁ ရက်
စစ်ကောင်စီတပ်ဟာ တော်လှန်ရေးတပ်ဖွဲ့တွေ ထိန်းချုပ်ထားတဲ့ မန္တလေး-မိုးကုတ်လမ်းပိုင်းကို ပြန်ထိန်းချုပ်ဖို့ ထိုးစစ်ဆင် တိုက်ခိုက်နေပြီး တိုက်ပွဲတွေ ဆက်ဖြစ်နေတယ်လို့ မြေပြင်သတင်းအရင်းအမြစ်တချို့က ရွှေဖီမြေကို ပြောပါတယ်။
စစ်ကောင်စီတပ်က မန္တလေး-မိုးကုတ်လမ်းပိုင်းကို ပြန်ထိန်းချုပ်ဖို့ သပိတ်ကျင်းမြို့နယ် ၇ မိုင်ကျေးရွာကနေ ထိုးစစ်ဆင် တိုက်ခိုက်နေတာ ဖြစ်ပါတယ်။
“စကစဘက်က ၇ မိုင်ကနေ ထိုးလာတာ။ လမ်းမကြီးအထိတော့ မရောက်သေးဘူး။ အဲဒီအနီးဝန်းကျင်မှာဘဲ တိုက်ပွဲဖြစ်နေတယ်။ စကစက ဒရုန်း၊ လက်နက်ကြီး၊ Y-12၊ ဂျက်ဖိုက်တာရော စုံနေတာပဲ။ လာချတာ” လို့ မြေပြင်သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
တိုက်ပွဲတွေ ဆက်ဖြစ်နေတာကြောင့် ဒီနေ့ အောက်တိုဘာ ၁၁ ရက်ကစပြီး မိုးကုတ်လမ်းပိုင်းကို တော်လှန်ရေးတပ်တွေဘက်က ယာယီပိတ်ထားလိုက်ပြီလို့ မိုးကုတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“ဖောတော့လမ်းဆုံကနေ ပိတ်တယ်လို့ ကြားတယ်။ ဒီနေ့မှာ စပိတ်တာ” လို့ ဆိုပါတယ်။
စစ်ကောင်စီတပ်ဟာ ပြီးခဲ့တဲ့ ဇူလိုင်လထဲမှာ သပိတ်ကျင်းမြို့ကို ပြန်ထိန်းချုပ်နိုင်ပြီးနောက် မိုးကုတ်-မန္တလေးလမ်းပိုင်းကို ပြန်ထိန်းချုပ်နိုင်ဖို့ ထိုးစစ်ဆင် တိုက်ခိုက်လာတာ ဖြစ်ပါတယ်။
သပိတ်ကျင်းမြို့နယ်မှာ တအာင်းတပ်မတော် TNLA အပါအဝင် မိုးကုတ်ဗျူဟာ၊ မန္တလေး PDF နဲ့ အမျိုးသားညီညွတ်ရေးအစိုးရ NUG လက်အောက်ခံတပ်တွေက စစ်ကောင်စီကို တိုက်ခိုက်နေတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
