မိုင်းရူပ၊ ဒီဇင်ဘာ ၄ ရက်၊ မိုးကုတ်
မနေ့ ဒီဇင်ဘာ ၃ရက် မနက် ၁၂နာရီ နာရီဝန်းကျင်မှာ မန္တလေးတိုင်း မိုးကုတ်မြို့အနီး ထင်းရှူးတောင်ရွာကို စစ်ကောင်စီက ဂျက်လေယာဥ်နဲ့ ဗုံးကြဲတိုက်ခိုက်ခဲ့တယ်လို့ မြေပြင်အခြေအနေသိရှိတစ်ဦးက ရွှေဖီမြေကို ပြောပါတယ်။
“ပြောင်ခေါင်း ၊ဘားနက်ဘက်က ထင်ရှူးတောင်ဘက်ကြဲတာ။ ထင်းရှူးခြံ လျှိုထဲမှာ ကျတာ။ လောလောဆယ်မြို့ထဲမှာရှိတဲ့ စကစဘက်က ထိုးစစ်ဆင်တာတော့ မရှိသေးဘူး” လို့ ဆိုပါတယ်။
ထင်းရှူးတောင်ကျေးရွာဟာ မိုးကုတ်အရှေ့ပိုင်းအနီးတောင်ကုန်းအမြင့်မှာတည်ရှိပြီး ဗုံးကြဲမှုကြောင့်ထိခိုက်သေဆုံးမှုတော့ မရှိဘူးလို့ သိရပါတယ်။
စစ်ကောင်စီတပ်ဟာ မိုးကုတ်မြို့ပေါ်နေရာတွေကိုတရုတ်ရဲ့အကူအညီနဲ့ ပြန်ထိန်းချုပ်ခွင့်ရပြီး မြို့ပြင်ရှိကျေးရွာတွေမှာတော့ PDF တော်လှန်ရေးတပ်တွေက ထိန်းချုပ်ထားတာ ဖြစ်ပါတယ်။
လက်ရှိမိုးကုတ်မြို့ရှိ မြို့ခံအားလုံးနီးပါးထွက်ပြေးတိမ်းရှောင်နေကြပြီး စစ်ကောင်စီဘက်က မြို့ပြင်နေရာတွေမှာ ထိုးစစ်ဆင်လာရင် တိုက်ပွဲဆက်ဖြစ်လာနိုင်တယ်လို့ မြို့ခံတွေက ပြောပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ ရက်နဲ့ ၃၀ ရက်မှာ တအာင်းတပ်မတော်- TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
