အင်းငယ်၊ ဧပြီ ၁၅ ရက်၊ အင်းလေး
ရှမ်းတောင် ညောင်ရွှေမြို့နယ် အင်းလေးဒေသမှာ စစ်ကောင်စီ လက်အောက်ခံ ပါတီဝင်တွေ ရောက်ရှိနေပြီး လာမယ့် ရွေးကောက်ပွဲအတွက် စတင်မဲဆွယ်နေကြပြီလို့ ဒေသခံတွေက ပြောပါတယ်။
အင်းလေးဒေသမှာ ရောက်ရှိနေတဲ့ စစ်ကောင်စီ လက်အောက်ခံ အင်းအမျိုးသားအဖွဲ့ချုပ်ပါတီ၊ ပြည်သူ့ရှေ့ဆောင်ပါတီ- PPP၊ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ- USDP နဲ့ မဘသ ဘုန်းကြီးတွေက ပြန်လည်ထူထောင်ရေးအတွက် ရောက်ရှိကာ ရွေးကောက်ပွဲမှာ မဲထည့်မှသာ အထောက်အပံ့ ပေးမယ်ဆိုပြီး ပြောဆိုစည်းရုံးနေတာပဲ ဖြစ်ပါတယ်။
တက်ကြွလှုပ်ရှားသူတစ်ဦးက “သက်သက်ခိုင်တို့ပါတီက အများဆုံးပဲ။ လှူတာက နည်းနည်း၊ ဓာတ်ပုံရိုက် ဖျာခင်းတာက များများ။ နိုင်ငံရေး နားမလည်တဲ့ တောသူတောင်သားတွေကို ဒီလိုဒီလို မဲထည့်ရင် နင်တို့ ချေးငွေရမယ် ဘာညာပေါ့။ အင်းပါတီလည်း ပါတယ်လေ။ အသားထဲက လောက်ကောင်တွေ” လို့ ပြောပါတယ်။
စစ်ကောင်စီ လက်အောက်ခံ ပါတီဝင်တွေက လှူဒါန်းထားတဲ့ ပစ္စည်းတွေဟာ ရှိတဲ့ ဒေသခံဦးရေ၊ ပျက်စီးတဲ့ အိမ်အရေအတွက်နဲ့ မလောက်ငှသလို သရုပ်ဆောင် ခိုင်နှင်းဝေ လာရောက် လှူဒါန်းစဉ်ကလည်း လူဦးရေအားလုံး မရရှိလိုက်တာကြောင့် အကူအညီ အများစု လိုအပ်နေသေးတယ်လို့ ဆိုပါတယ်။
ပြန်လည်ထူထောင်ရေး ဆောင်ရွက်ပေးနေသူတစ်ဦးက “တချို့ရွာတွေက ရွာရဲ့ ရန်ပုံငွေနဲ့ ကိုယ်ထူကိုယ်ထ လုပ်ကြတာ။ သူများ လာလှူကြတာက အကုန်မရလို့လေ။ သာလေတို့ဆိုရင် တော်တော်များများ ပြီးနေပြီ။ မဆောက်နိုင်သေးတဲ့ ရွာတွေလည်း အများကြီး ကျန်ပါတယ်” လို့ ပြောပါတယ်။
အင်းလေးမှာ ပျက်စီးတဲ့ လူနေအိမ်တွေ ပြန်ဆောက်ဖို့အတွက် ဝါးလုံး အရေးပေါ် လိုအပ်နေပြီး လူနေအိမ်တစ်လုံးကို ၄ သိန်းခန့် ကုန်ကျမယ်လို့ သိရပါတယ်။
ငလျင်ဒဏ် ကြုံပြီးနောက်ပိုင်း အင်းလေးဒေသကို စစ်ခေါင်းဆောင် မင်းအောင်လှိုင်အပါအဝင် စစ်ကောင်စီ အကြီးအကဲတချို့ မကြာခဏ လာရောက်နေပြီး ဟိုတယ်ဇုန် ပတ်ပတ်လည်အပါအဝင် အင်းလေးကန်ပတ်လမ်းတစ်ခွင်မှာ ပအိုဝ်းပြည်သူ့စစ်- PNA က လုံခြုံရေး ယူထားပေးတယ်လို့ ဒေသခံတွေက ပြောပါတယ်။
