ပျားကြီး၊ နိုဝင်ဘာ ၁၂ ရက်၊ မိုးကုတ်
တိုက်ပွဲ တကျော့ပြန် ဖြစ်ပွားလာနိုင်တဲ့ အခြေအနေကြောင့် မိုးကုတ်မြို့ခံတွေ ထွက်ပြေးတိမ်းရှောင်နေကြတဲ့အတွက် ကားခဟာ အရင်ကထက် ၅ ဆနီးပါးအထိ မြှင့်တက်သွားတယ်လို့ ဒေသခံတွေက ရွှေဖီမြေကို ပြောပါတယ်။
မြို့ကို ထိန်းချုပ်ထားတဲ့ တအာင်းတပ်မတော်- PSLF/TNLA ပြန်လည် ဆုတ်ခွာမှု ရှိခဲ့ပြီးနောက်ပိုင်း လေကြောင်း တိုက်ခိုက်မှုနဲ့မြို့သိမ်းတိုက်ပွဲ ရှိလာနိုင်တဲ့ အခြေအနေကြောင့် မိုးကုတ်မြို့ခံတွေဟာ ဘေးလွတ်ရာ ကြိုတင်ထွက်ပြေးတိမ်းရှောင်လာကြတာပဲ ဖြစ်ပါတယ်။
“လူတွေက နေ့တိုင်း ကားလက်မှတ်ဝယ်ဖို့ ကြိုးစားနေကြတယ်။ အဓိကတော့ မန္တလေးဖက်ကိုပေါ့။ ကားငှားရ အရမ်းခက်သလို ဈေးကလည်း ခေါင်ခိုက်နေတယ်။ ဒါလည်း သွားချင်တဲ့သူက အများကြီးပဲ” လို့ မိုးကုတ်မြို့ခံ ကျောက်မျက်လုပ်ငန်းရှင်တစ်ဦးက ပြောပါတယ်။
ထောင်နဲ့ချီတဲ့ မြို့ခံတွေဟာ မြို့ကို စွန့်ခွာဖို့အတွက် နေ့စဉ် ကြိုးစားနေကြတယ်လို့ သူက ဆက်ပြောပါတယ်။
လက်ရှိအချိန်မှာ ကားခဟာ တစ်ဦးကို ကျပ် ၈ သိန်းကနေ ၁၀ သိန်းအထိ ရှိနေပြီး လူတစ်ဦးကို ကျောပိုးအိတ်တစ်လုံးပဲ ယူဆောင်ခွင့် ပေးထားပြီး တခြားပစ္စည်းတွေ တင်ဆောင်ခွင့် မပေးထားဘူးလို့ မိုးကုတ်မြို့အနောက်ပိုင်းမှ အသက် ၅၀ အရွယ် အမျိုးသားတစ်ဦးက ပြောပါတယ်။
ဒါ့အပြင် ကုန်ကျစရိတ် အနည်းငယ် သက်သာတဲ့ ရှမ်းမြောက် ကျောက်မဲမြို့ဖက်ကိုလည်း တိမ်းရှောင်သူတွေ ရှိနေပြီး မိုးကုတ်-ကျောက်မဲကားခက တစ်ဦးကို ၂ သိန်းကနေ ၄ သိန်းအထိ ရှိတယ်လို့ မြို့ခံ ယာဉ်မောင်းတစ်ဦးက ပြောဆိုပါတယ်။
မြို့ကို ထိန်းချုပ်ထားတဲ့ တအာင်းတပ်မတော်ဟာ ဒီလ ၂၅ ရက်နေ့ နောက်ဆုံးထားပြီး မိုးကုတ်ကနေ ပြန်လည်ဆုတ်ခွာမှာဖြစ်ပေမဲ့ မန္တလေး PDF အပါအဝင် မဟာမိတ်တပ်တွေက မြို့ကို ဆက်လက် ထိန်းချုပ်သွားမယ်လို့ ထုတ်ပြန်ကြေညာထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
