မိုင်းရူပ၊ ဧပြီ ၆ ရက်၊ မန္တလေး
ငလျင်ဒဏ်ကို ပြင်းပြင်းထန်ထန် ခံစားခဲ့ရတဲ့ မန္တလေးမြို့မှာ ကွင်းပြင်နဲ့ လမ်းဘေးတွေမှာ တဲထိုးပြီး ခိုလှုံနေတဲ့ ဒေသခံတွေ မိုးသက်လေပြင်းဒဏ် ပြန်ခံနေရတယ်လို့ ဒေသခံတွေက ရွှေဖီမြေကို ပြောပါတယ်။
ငလျင် လှုပ်ခတ်မှုအပြီး နေအိမ်တွေ ပျက်စီးသွားတာကြောင့် ဒေသခံတွေဟာ အိမ်ထဲမှာ မနေရဲကြတော့ဘဲ ကွင်းပြင်နဲ့လမ်းဘေးတွေမှာ တဲထိုးပြီး နေထိုင်ကြရချိန် မနေ့ ဧပြီ ၅ ရက် ညနေပိုင်းမှာ မိုးရွာသွန်းခဲ့ပြီး လေပြင်း တိုက်ခတ်ရာ ယာယီ တဲထိုးပြီး နေထိုင်သူတွေ ဒုက္ခပြန်ကြုံခဲ့ကြရတာ ဖြစ်ပါတယ်။
“မိုးလည်း ကြီး၊ လေလည်း တိုက်တယ်။ လမ်းဘေး ယာယီတဲမှာ နေသူတွေ ထပ်ဒုက္ခရောက်ကြရပါတယ်။ မိုးကြီးလာတော့ နေရာရွှေ့တာရှိတယ်။ ကိုယ့်အိမ်အောက် မရဲတရဲနဲ့ ပြန်ခိုတာလည်းရှိတယ်” လို့ ငလျင်ဒဏ်သင့်ခဲ့ရတဲ့ မန္တလေးမြို့ခံတစ်ဦးက ရွှေဖီမြေကို ပြောပါတယ်။
မနေ့ည ၇ နာရီဝန်းကျင်မှာ မိုး စတင်ရွာသွန်းခဲ့ပြီး ဒေသခံတွေ ခိုလှုံဖို့ ယာယီ ထိုးထားတဲ့ တဲတွေ ပျက်စီးပြီး ဒီနေ့ ဧပြီ ၆ ရက် မနက် ၈ နာရီဝန်းကျင်မှာတော့ မိုးတိတ်သွားပြီလို့ သူက ဆက်ပြောပါတယ်။
ပြီးခဲ့တဲ့ မတ်လ ၂၈ ရက်မှာ ပြင်းအား ၇.၇ အဆင့်ရှိတဲ့ ငလျင် လှုပ်ခတ်မှုကြောင့် စစ်ကိုင်း၊ မန္တလေး၊ နေပြည်တော်နဲ့ ရှမ်းတောင်တွေမှာ သေဆုံး ဒဏ်ရာရသူ ၃ ထောင်ကျော် ရှိနေပြီး အထင်ကရနေရာအပါအဝင် အဆောက်အဦးတွေလည်း ထိခိုက်ပျက်စီးခဲ့ပါတယ်။
လက်ရှိအချိန်ထိ နေရာတချို့မှာ ကူညီကယ်ဆယ်ရေး ဆက်လုပ်နေပြီး မထုတ်နိုင်သေးတဲ့ အလောင်းတွေလည်း ဆက်ရှိနေပါတယ်။
ငလျင်ဒဏ်ကြောင့် မန္တလေးမှာ ထိခိုက်သေဆုံးမှု အများဆုံးဖြစ်ပြီး သေဆုံးသူ ၂,၁၂၂ ဦးနဲ့ ဒဏ်ရာရသူ ၂,၆၀၉ ဦးအထိ ရှိကြောင်း စစ်ကောင်စီရဲ့ စာရင်းအရ သိရပါတယ်။
ဒါ့အပြင် စစ်ကောင်စီရဲ့ မနေ့ ဧပြီ ၅ ရက်အထိ စာရင်းအရ နိုင်ငံတစ်ဝန်းမှာ ငလျင်ကြောင့် သေဆုံးသူ ၃,၄၅၅ ဦးနဲ့ ဒဏ်ရာရသူ ၄,၈၄၀ ဦးရှိပြီး ပျောက်ဆုံးနေသူ ၂၂၀ ဦး ရှိတယ်လို့ ထုတ်ပြန်ထားပါတယ်။
