မိုင်းရူပ၊ ဇူလိုင် ၂၄ ရက်၊ မြဝတီ
ကရင်ပြည်နယ် မြဝတီမြို့ပေါ်မှာ သောင်ရင်းမြစ်ရေ မြှင့်တက်လာတာကြောင့် မြေနိမ့်ပိုင်းမှာရှိတဲ့ နေအိမ်တွေ နစ်မြှုပ်နေတယ်လို့ မြဝတီမြို့ခံတစ်ဦးက ရွှေဖီမြေကို ပြောပါတယ်။
“မိုးကတော့ ဒီနေ့တိတ်တယ်။ ရေကတော့ တက်နေတုန်းပဲ။ အနိမ့်ပိုင်းမှာ နေတဲ့သူတွေ အကုန်နစ်မြှုပ်ကုန်ပြီလေ။ အလယ်ပိုင်းမှာ နေတဲ့သူတွေလည်း စိုးရိမ်နေရတယ်” လို့ ဒီနေ့ ဇူလိုင် ၂၄ ရက် မနက်ပိုင်းရဲ့ အခြေအနေကို မြဝတီမြို့ခံတစ်ဦးက ပြောပြပါတယ်။
နေအိမ်နစ်မြှုပ်သွားတဲ့သူတွေအတွက် ရေဘေးနဲ့ လွတ်တဲ့ ဘုန်းကြီးကျောင်းတွေမှာ ကယ်ဆယ်ရေးစခန်းတွေ ဖွင့်လှစ်ထားတယ်လို့ ၎င်းက ဆက်ပြောပါတယ်။
စစ်ကောင်စီရဲ့ မိုးလေဝသနဲ့ ဇလဗေဒညွန်ကြားမှူးဦးစီးဌာနကလည်း သောင်ရင်းမြစ်ရေဟာ မြဝတီမြို့ရဲ့ စိုးရိမ်ရေမှတ် ၉ ပေခွဲခန့် ကျော်လွန်နေပြီး နောက် ၂၄ နာရီအတွင်း ၃ ပေခန့်ထက် မြှင့်တက်လာနိုင်တယ်လို့ ဆိုပါတယ်။
ဒါ့အပြင် တာချီလိတ်၊ ရွှေကျင်၊ မဒေါက်နဲ့ ငသိုင်းချောင်း စတဲ့မြို့က မြစ်ကမ်းဘေးအနီး နေထိုင်တဲ့သူတွေ၊ မြေနိမ့်ပိုင်းမှာ နေထိုင်သူတွေအနေနဲ့ ဘေးလွတ်ရာကို ရှောင်တိမ်းကြဖို့ စစ်ကောင်စီရဲ့ မိုးဇလက သတိပေးထားပါတယ်။
ကရင်အမျိုးသားအစည်းအရုံး (KNU) ကလည်း ဇူလိုင် ၂၃ ရက်နဲ့ ၂၄ ရက်မှာ ဝီဖာမုန်တိုင်းရဲ့ အရှိန်ကြောင့် ကရင်ပြည်နယ်အပါအဝင် မြန်မာနိုင်ငံ အရှေ့တောင်ဘက်တွေမှာ ရေကြီး၊ မြေပြိုတာတွေ ကြုံတွေ့ရနိုင်လို့ သဘာဝဘေးကို သတိထားဖို့ မနေ့ ဇူလိုင် ၂၃ ရက်မှာ သတိပေးချက် ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
