မိုင်းပန်ပျော်၊ မေလ ၂၉ ရက်၊ မိုင်းဝီး
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ် မိုင်းဝီးဒေသ ပန်ဟန်ကြီးကျေးရွာအုပ်စုထဲက ဟိုတီးကျေးရွာနဲ့ စယ်နေကျေးရွာက ဒေသခံအမျိုးသား ၂ ဦးကို ကိုးကန့်တပ်မတော်-MNDAA က ဓားပြတိုက်လို့ စွပ်စွဲဖမ်းဆီးသွားခဲ့တာလို့ ဒေသခံတွေက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ မေလ ၁၆ ရက်မှာ အဲဒီအမျိုးသား ၂ ဦးဟာ ကွတ်ခိုင်မြို့နယ် ဟိုရီးကျေးရွာက ဒေသခံတွေရဲ့ နေအိမ်ကို ဓားပြတိုက်ခဲ့တာလို့ ဒေသခံတွေက MNDAA တပ်ကို တိုင်ကြားခဲ့ပြီးနောက် အဲဒီအမျိုးသား ၂ ဦးကို နေအိမ်မှာ လာရောက်ဖမ်းဆီးသွားခဲ့တာလို့ စယ်နေကျေးရွာဒေသခံအမျိုးသားတစ်ဦးက ရွှေဖီမြေကို ပြောပါတယ်။
“သူတို့နှစ်ယောက် ဟိုရီးမှာ မီးသွေးသွားဖုတ်တာ အဲ့ဒါနဲ့ သူတို့နှစ်ယောက်ကို ဟိုရီးကျေးရွာကလူတွေ သူတို့ ၂ ယောက်ကို ဓားပြတိုက်တယ်လို့ ကိုးကန့်ကို သွားတိုင်တာ။ ကိုးကန့်က သူတို့နှစ်ယောက်ကို လာဖမ်းပြီး နမ့်ဖတ်ကာတိုက်နယ်ရုံးမှာသွားထားတာ။ အဲ့နောက် ကျနော်နဲ့ ဟိုရီးဥက္ကဌနဲ့ သူတို့ ၂ ယောက် ဓားပြတိုက်ခဲ့တယ်လို့ တိုင်တဲအိမ်သွားမေးတာ သူတို့ပြော သူတို့မတိုင်ရဘူးလို့ ပြောတာ”
ပုဂ္ဂိုလ်မကျေနပ်ချက်နဲ့ တိုင်ကြားတာလည်း ဖြစ်နိုင်လို့ အဲဒီအမျိုးသား ၂ဦးရဲ့ ဓားပြတိုက်မှုကို ကိုးကန့်တပ်အနေနဲ့ အမှုကို သေချာစီစစ်ပြီးမှသာ အမိန့်ချဖို့ ကျေးရွာခံတွေက တောင်းဆိုနေကြပါတယ်။
အဆိုပါ အမျိုးသား ၂ ဦးကို ဓားပြလို့စွပ်စွဲပြီး သေဒဏ်ပေးဖို့ MNDAA တပ်က ပြင်ဆင်နေတယ်လို့ ဒေသခံတွေပြောပေမဲ့ ရွှေဖီမြေအနေနဲ့တော့ သီးခြားအတည်မပြုနိုင်သေးပါဘူး။
အလားတူ ပြီးခဲ့တဲ့ မေလ ၅ ရက်မှာလည်း တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ် မုံးစီးဒေသ နမ့်မောကျေးရွာက ဥက္ကဌကို ကိုးကန့်တပ်မတော်-MNDAA က တပ်သား ၂ ဦးက အကြောင်းမဲ့ ပါးရိုက်ခဲ့တဲ့ ဖြစ်စဉ် ဖြစ်ပွါးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
