လွေးထွေး၊ ဇွန်လ ၄ ရက်၊ ကွတ်ခိုင်
ကွတ်ခိုင်မြို့နယ် မိုင်းယုလေးဒေသ ပန်ကိုင်ပန်လောအုပ်စု ဟိုခိုရွာက သာသနာ့ပိုင်နယ်မြေထဲကို ကိုးကန့်တပ် MNDAA က စစ်ဆေးရေးဂိတ်လုပ်ဖို့ ပြင်ဆင်နေကြောင်း ရွာခံတွေရဲ့ ပြောပြချက်အရ သိရပါတယ်။
ပြီးခဲ့တဲ့ ဇွန်လ ၁ ရက်ကတည်းက မိုင်းယုလေးဒေသ ဟိုခိုရွာရဲ့ အလှူခံနေရာဖြစ်တဲ့နေရာကို ရွာခံတွေနဲ့ တိုင်ပင်ဆွေးနွေးတာမရှိဘဲ MNDAA က ဖျက်ဆီးပြီး ဂိတ်စောင့်ဖို့ ပြင်ဆင်ခဲ့ပေမဲ့ ရွာခံတွေရဲ့ ကန့်ကွက်မှုကြောင့် အလှူခံနေရာဘေးမှာ ဂိတ်ကို ပြန်ဆောက်လုပ်ခဲ့တာ ဖြစ်ပါတယ်။
ဟိုခိုရွာမှ တာဝန်ရှိသူက “ကျနော်တို့နဲ့ တိုင်ပင်တာမရှိဘူး။ ဒီအတိုင်းလာလုပ်တာဖြစ်တယ်။ ကျနော်တို့က ပေးမလုပ်စေချင်ဘူး။ ရွာအဝင်အထွက်နေရာလည်းဟုတ်တယ်။ သာသနာ့မြေလည်းဟုတ်တယ်ပေါ့။ အဲဒါကို ဒီအနီးအနားမှာရှိတဲ့ သူတို့ လူကြီးနဲ့ သွားပြောတယ် သူတို့နဲ့ မဆိုင်ဘူးတဲ့” လို့ ပြောပါတယ်။
ဖြစ်စဉ်နဲ့ပတ်သက်ပြီး အကြောင်းစုံကို ကွတ်ခိုင်ရှိ MNDAA ရဲ့ မြို့နယ်ရုံးထံ စာပို့ထားပေမဲ့ ဒီနေ့ ဇွန် ၄ ရက် မနက်ပိုင်းအထိ အကြောင်းပြန်လာတာ မရှိကြောင်း သူက ဆိုပါတယ်။
နောက်ထပ်ရွာခံ အမျိုးသမီးက “ကျမတို့ရွာအဝင်အထွက်မှာ သူတို့လုပ်မယ်ဆိုရင် လက်နက်ကိုင်ဖြစ်နေတာကြောင့် ကျမတို့အတွက် စိုးရိမ်စရာတွေ များလာမယ်။ လူမျိုးမတူ စကားမတူတော့ ပိုစိတ်ပူရတယ်။ အထူးသဖြင့် ကျမတို့ အမျိုးသမီးတွေအတွက်လည်း အသွားအလာက အဆင်မပြေတော့ဘူး” လို့ ပြောပါတယ်။
၎င်းနေရာမှာ MNDAA က ဂိတ်ဆောက်လုပ်တာမပြီးခင် သက်ဆိုင်ရာက တားမြစ်ပေးကြဖို့ ရွာခံတွေက တောင်းဆိုထားကြပါတယ်။
အလားတူ ကွတ်ခိုင်မြို့ လွယ်ဆမ်ဆစ်တောင်ခြေရှိ နွားခြံအနီးမှာလည်း ပြီးခဲ့တဲ့ မေလ နောက်ဆုံးပတ်ကစပြီး MNDAA က စစ်ဆေးရေးဂိတ် ဖွင့်လှစ်ထားနေကြောင်း ဒေသခံတွေရဲ့ ပြောပြချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
