လွေးဇွန်မိုး၊ ဇွန်လ ၂ ရက်၊ မုံးကိုး
ကိုးကန့်တပ်-MNDAA ထိန်းချုပ်ထားတဲ့ ရှမ်းမြောက် မူဆယ်မြို့နယ် မုံးကိုးမြို့ရှိ ကျေးရွာတချို့မှာ ၅ နှစ်ကြာတဲ့အထိ စာသင်ကျောင်းတွေ ပိတ်ထားရတာကြောင့် ကျောင်းပြန်ဖွင့်ပေးဖို့ ဒေသခံတွေက တောင်းဆိုနေကြပါတယ်။
ပန်စီတိုင်း၊ နမ့်ဟာ၊ နမ့်ဝါ၊ မန်ကောင်း(ပန်ဟိုင်)၊ ရှောက်ရွှေစင်၊ ဖာငပ်ရွာ(ရွာသစ်) စတဲ့ကျေးရွာတွေမှာ ကိုဗစ်ကာလ ၂၀၂၀ ခုနှစ်ကနေ အခု ၂၀၂၅ ခုနှစ်အထိ ၅ နှစ်ကြာ ကျောင်းပိတ်ထားရဆဲဖြစ်တယ်လို့ ဒေသခံ အမျိုးသားတစ်ဦးက ပြောပါတယ်။
“သူတို့(MNDAA)နဲ့ ညှိကြည့်တာ သူတို့က တရုတ်ကျောင်း ဖွင့်ပေးဖို့ရာခိုင်နှုန်းများတယ်။ ဗမာကျောင်း မဖွင့်သေးဘူးနဲ့တူတယ်။ တရုတ်ကျောင်းတောင်မှ အခုချက်ချင်း မဖွင့်ပေးလောက်ဘူး။ တစ်နှစ်လောက် စောင့်ရအုံးမယ်ထင်တယ်။ ဒီနှစ်ကတည်းက ကျောင်းဖွင့်ချင်နေတာ။ ပိတ်ထားတာ ၅ နှစ်လောက်ရှိပြီလေ။ ကျောင်းတွေတောင် ပျက်စီးနေပြီ”
အခု ၂၀၂၅ ခုနှစ်မှာ ဒေသခံတွေက ကိုယ်ထူကိုယ်ထ ကျောင်းဖွင့်နိုင်ဖို့ ကြိုးစားနေပြီး ဆရာ၊ ဆရာမ နဲ့ စာရေးကိရိယာတွေ အကူအညီလိုအပ်နေတယ်လို့ အထက်ပါ အမျိုးသားက ပြောပါတယ်။
“မုံးကိုးမြို့ထဲ နဲ့ ဖောင်းဆိုင်ရွာမှာက မနှစ်ကတည်းက မြန်မာ ကျောင်းစဖွင့်တာ။ နောက်ကျောင်းတစ်ကျောင်းမှာ သူတို့က တရုတ်စာသင်ကျောင်း ဖွင့်ထားတယ်။ ကျန်တဲ့ ကျေးအုပ်စုတွေဘက်တော့ မဖွင့်ပေးသေးဘူး”
MNDAA တပ်က မုံးကိုးမြို့ထဲနဲ့ ဖောင်းဆိုင်ကျေးရွာက စာသင်ကျောင်းတွေကို ပြီးခဲ့တဲ့ ၂၀၂၄ ခုနှစ်မှာ စတင်ဖွင့်လှစ်ပေးခဲ့တာဖြစ်ပြီး ကျန်တဲ့ကျေးရွာတွေမှာတော့ စာသင်ကျောင်းတွေ ဖွင့်လှစ်ပေးခြင်းမရှိသေးဘူးလို့ ဆိုပါတယ်။
မုံးကိုးမြို့ကို ပြီးခဲ့တဲ့ ၂၀၂၃ ခုနှစ် နိုဝင်ဘာ ၇ ရက်မှာ MNDAA တပ်က တိုက်ခိုက် သိမ်းပိုက်နိုင်ခဲ့တာဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
