အင်းငယ်၊ ဧပြီ ၂ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ် အနောက်ဘက်ခြမ်း ပဆေးလာရွာအနီး ပေ ၁၀၀ ကျော်နက်တဲ့ တွင်းတစ်ခု ပေါ်လာတာကြောင့် နေ့စဉ်နဲ့အမျှ စိုးရိမ်နေရတယ်လို့ ဒေသတွင်း စစ်ဘေးရှောင်တွေက ပြောပါတယ်။
စစ်ကိုင်းနဲ့ မန္တလေးတိုင်းကို ဗဟိုပြုပြီး ၇.၇ မီတာစကေး ပြင်းအားရှိတဲ့ ငလျင် လှုပ်ခတ်ပြီးနောက် မတ်လ ၂၉ ရက်မှာ ပေါ်လာတာဖြစ်ပြီး နေ့စဉ် ဖြည်းဖြည်းချင်း တအိအိနဲ့ ပြိုကျနေတယ်လို့ ဆိုပါတယ်။
မျက်မြင်တွေ့ရှိသူ စစ်ဘေးရှောင်တစ်ဦးက “လှုပ်တာပြီးတော့ မြေကြီး အက်လာပြီး အဲတွင်း ပေါ်လာတယ်။ အပင်ကြီးတစ်ပင် တွင်းထဲ ဝင်သွားတယ်။ တစ်ဖြည်းဖြည်း တွင်းက ကျယ်လာတယ်။ ကျနော်တို့ နေတဲ့နေရာတောင် အောက်မှာ ကလိန်ပေါက်ကြီး ဖြစ်နေမလား ကြောက်နေရတယ်” လို့ ပြောပါတယ်။
အဲဒီတွင်းဟာ အကျယ် ပေ ၁၀၀ ကျော် ရှိနိုင်ပြီး နေ့တိုင်း ဆက်ပြိုကျနေမယ်ဆိုရင် ဒီထက်မက တွင်း ပိုကျယ်လာနိုင်တဲ့အပြင် ပတ်ပတ်လည်က စစ်ဘေးရှောင်စခန်းတွေအပေါ်လည်း အန္တရာယ် ကျရောက်လာနိုင်တယ်လို့ သိရပါတယ်။
လက်ရှိမှာ အဲဒီတွင်းကို လာရောက် ကြည့်ရှုသူ များနေပြီး တော်လှန်ရေး အင်အားစုတွေက တွင်းထဲ မဆင်းကြဖို့ တားမြစ်ထားတာကိုလည်း တွေ့ရပါတယ်။
အလားတူ ကရင်ပြည် ကော့ကရိတ်မြို့နယ်တောင်ပိုင်း လန်းဖားရွာအနီးမှာလည်း မြေငလျင်ဒဏ်ကြောင့် ပေ ၃၀ ခန့်နက်တဲ့ တွင်းတွေ ပေါ်လာတယ်လို့ သိရပါတယ်။
မတ်လ ၂၈ ရက်က ဖြစ်ပွားခဲ့တဲ့ ငလျင်အတွင်း ကရင်နီပြည်မှာ ဘုရားကျောင်းအနည်းငယ် ထိခိုက်မိတာကလွှဲလို့ ကျန်တာကြီးကြီးမားမား ထိခိုက်မှု မရှိပေမဲ့ နန်းစံဖူးချောင်းဟာ ရေ ၃ ပေကျော် ကျဆင်းပြီး အရောင် ပြောင်းနေတာကြောင့် အသုံးပြုလို့ မရသေးဘူးလို့ ဒေသတွင်း စစ်ဘေးရှောင်တွေက ပြောဆိုပါတယ်။
