မြတ်နိုး၊ မတ်လ ၁၅ ရက်၊ မချမ်းဘော
ကချင်ပြည်နယ် ပူတာအိုခရိုင် မချမ်းဘောမြို့နယ် နမ်ခမ်ရွာရှိ လယ်ယာမြေမှာ လတ်တလော စက်ကြီးနဲ့ ရွှေ အလွန်အကျွံ တူးဖော်လာလို့ စိုးရိမ်နေကြောင်း ဒေသခံတွေက ပြောပါတယ်။
“လယ်မြေတွေမှာ တူးနေတာ။ စက်ယန္တရားကြီးတွေနဲ့ အလွန်အကျွံ တူးနေတော့ ဒေသခံတွက အဲဒီ လယ်က စပါးတွေကိုပဲ မှီခိုနေကြရတာ” လို့ ဒေသခံတစ်ဦးက ပြောပါတယ်။
ဒေသခံတချို့က လယ်ခြံတွေကို ခရိုနီတွေဆီ ရောင်းစားလိုက်တာမျိုး ဖြစ်နေတယ်လို့ ဆိုပါတယ်။
ဒါ့အပြင် ပူတာအိုမြို့နယ်ရဲ့ နေရာတော်တော်များများမှာလည်း ရွှေ အလွန်အကျွံ တူးဖော်လာနေတာ တွေ့ရတယ်လို့ ပူတာအိုဒေသကို စောင့်ကြည့်နေတဲ့ လူငယ်တစ်ဦးက ပြောပါတယ်။
“နမ်ခမ်က မချမ်းဘောမြို့နယ်ထဲက ဟုတ်တယ်။ အခု ဖတ်မာနဲ့ မူလာ ေချာင်းဆုံ ဘက်မှာလည်း ရွှေတူးနေတာ တစ်လ လောက် ရှိပြီ။ ဘားထီခီဆိုတဲ့လူနဲ့ ခရိုနီ အုပ်စုက ခေတ်ပျက်ထဲ ဒေသခံတွရဲ့ မြေကို ဝယ်ယူပြီး ရွှေတွေ အလွန်အကျွံ တူးယူနေတာ။ ဖတ်မာနဲ့ မူလာ ေချာင်းဆုံက ပူတာအို မြို့နယ် ဟုတ်တယ်”
ဖတ်မာဘက်မှာတော့ ဘားထီခီ ခရိုနီအုပ်စုက သိန်း ၂ ထောင်၊ အောက်ပြည်က တက်လာတဲ့ ခရိုနီအုပ်စုက သိန်း ၈၀၀ ပေးပြီး တူး နေတာဖြစ်လို့ ရွာခံတွေလည်း ငွေ ယူထားတော့ ငြိမ်နေတယ်လို့ ဆိုပါတယ်။
အောက်ပြည်က ခရိုနီအုပ်စုက မူလာချောင်းဆုံမှာ ရွှေတူးပြီး ဘားထီခီ ခရိုနီအုပ်စုက ဖတ်မာချောင်းအထက်မှာ ရွှေတူးနေကာ ပူတာအို နေရာအနှံ့မှာ ရွှေတူးနေတာတွေ များလာတာကြောင့် ထိန်းချုပ်ဖို့ လိုနေပြီလို့ သူက ပြောပါတယ်။
မြေ ရောင်းစားလိုက်တဲ့ ဒေသခံတွေက ငြိမ် နေပေမဲ့ ဒေသခံ အများစုကတော့ လယ်မြေအပြင် ခြံတွေထဲမှာပါ ရွှေ အလွန်အကျွံ တူးလာတာကြောင့် ဒေသတွင်း စိုက်ပျိုးမြေ ပျက်ကာ ဆန်စပါး မလုံလောက်မှာကို စိုးရိမ်နေကြတယ်လို့ ဆိုပါတယ်။
မချမ်းဘောနဲ့ ပူတာအိုမြို့နယ်ကိုတော့ လက်ရှိမှာ စစ်ကောင်စီက ထိန်းချုပ်ကာ အုပ်ချုပ်နေဆဲ ဖြစ်ပါတယ်။
