လွေးထွေး၊ မတ်လ ၂၆ ရက်
မြန်မာ-ထိုင်းနယ်စပ်အနီး ကရင်တပ်မတော်- KNU/KNLA ဌာနချုပ်အနီး ၃၆ နှစ်ကြာ နေရာယူ တပ်စွဲထားတဲ့ စစ်ကောင်စီတပ်ရဲ့ ခလယ်ဒေး တပ်စခန်းကို KNLA နဲ့ ပူးပေါင်းတပ်ဖွဲ့က တိုက်ခိုက်သိမ်းပိုက်နိုင်ခဲ့ပါတယ်။
မနေ့ မတ်လ ၂၅ ရက် ညနေ ၄ နာရီဝန်းကျင်မှာ KNLA နဲ့ ပူးပေါင်းတပ်က တိုက်ခိုက်သိမ်းယူနိုင်ခဲ့တာ ဖြစ်ပြီးတော့ ပြီးခဲ့တဲ့ မတ်လ ၂၂ ရက်ကတည်းက KNLA က ဦးဆောင်တိုက်ခိုက်ပြီး ၄ ရက်မြောက်နေ့မှာ တပ်စခန်းကို သိမ်းယူနိုင်ခဲ့တာလို့ ဆိုပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “ဟုတ်ပါတယ် ၃၆ နှစ် ကြာပြီးမှ ကျနော်တို့လက်ထဲ ပြန်ရောက်လာတာ။ အဲစခန်းက ကျနော်တို့ ဌာနချုပ်နဲ့ အနီးဆုံးစခန်း ဖြစ်တယ်” လို့ ရွှေဖီမြေသို့ ပြောပါတယ်။
စခန်းမကျဖို့အတွက် စစ်တပ်က ဂျက်ဖိုက်တာနဲ့ ဗုံးကြဲခဲ့တဲ့အပြင် Y12 ပါ အသုံးပြုတိုက်ခိုက်ခဲ့သလို တပ်သားတချို့က စခန်းအတွင်းရှိ လက်နက်တချို့ကို မီးရှို့ဖျက်ဆီးပြီး ထွက်ပြေးသွားခဲ့တယ်လို့ ဆိုပါတယ်။
စခန်းသိမ်း တိုက်ပွဲအတွင်း စစ်ကောင်စီတပ်ရဲ့ အလောင်း ၂ လောင်းအပြင် လက်နက် ၁၃ လက်နဲ့ တခြားစစ်လက်နက်ပစ္စည်းတွေလည်း သိမ်းဆည်းရမိခဲ့ကြောင်း ထုတ်ပြန်ရေးသားထားပါတယ်။
အလားတူ ပြီးခဲ့တဲ့ မတ်လ ၁၄ ရက်ကလည်း KNLA တပ်မဟာ(၇)နယ်မြေထဲက စစ်ကောင်စီတပ်ရဲ့ ပူလူတူ တပ်စခန်းကို KNLA နဲ့ ပူးပေါင်းတပ်ဖွဲ့က နှစ်ပတ်ကြာ အပြင်းအထန် တိုက်ခိုက်ခဲ့ပြီးနောက် တပ်စခန်းကို သိမ်းပိုက်နိုင်ခဲ့ပါတယ်။
