ရွှေဖီမြေ၊ စက်တင်ဘာ ၈ ရက်၊ လယ်မူလား
ကရင်အမျိုးသားအစည်းအရုံး KNU ထိန်းချုပ်ထားတဲ့ တနင်္သာရီတိုင်း မြိတ်ထားဝယ်ခရိုင် လယ်မူလားမြို့နယ် ထမင်းမစားရွာအတွင်းမှာ တပ်စွဲထားတဲ့ စစ်ကောင်စီတပ်ရဲ့ တပ်စခန်းကို ကရင်အမျိုးသားလွတ်မြောက်ရေးတပ်မတော် KNLA နဲ့ ပူးပေါင်းတပ်တွေက ဒီနေ့ စက်တင်ဘာ ၈ ရက်မှာ တိုက်ခိုက်သိမ်းပိုက်နိုင်ခဲ့တယ်လို့ KNU က ထုတ်ပြန်ပါတယ်။
ဒီနေ့ စက်တင်ဘာလ ၈ ရက် မနက်ပိုင်း ၇ နာရီဝန်းကျင်မှာ ထမင်းမစားရွာအတွင်းက စစ်ကောင်စီတပ်ရဲ့ တပ်စခန်းကို KNLA၊ တပ်မဟာ(၄) လက်အောက်ခံ KNDO တပ်ရင်း (၇)၊ တပ်ခွဲ (၂)၊ တပ်ခွဲ (၅)၊ KNLA အထူးတပ်ဖွဲ့၊ ပလောပြည့်သူ့ကာကွယ်ရေးတပ်ဖွဲ့နဲ့ တော်လှန်ရေးပူးပေါင်းတပ်ဖွဲ့တွေက တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
၎င်းတပ်စခန်းဟာ စစ်ကောင်စီတပ်ရဲ့ ခြေလျင်တပ်ရင်း (ခလရ-၂၈၀) တပ်ရင်း၊ အမြောက်တပ်(အမတ-၃၀၉) တပ်ရင်း၊ အမှတ် (၁၂) တပ်မတော်လေ့ကျင့်ရေး သင်တန်းကျောင်းမှ တပ်ဖွဲ့ဝင် စုစုပေါင်း (၄၀) ကျော် တပ်စွဲထားတဲ့ တပ်စခန်းဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ စက်တင်ဘာ ၃ ရက်က ခလယ်လွီထူခရိုင် မူးမြို့နယ်မှာ စစ်ကောင်စီတပ်က လက်နက်ကြီး ပစ်ခတ်လို့ ဒေသခံ ၁ ဦး သေဆုံးပြီး ၂ ဦး ဒဏ်ရာ ရရှိခဲ့တယ်လို့ KNU က ထုတ်ပြန်ခဲ့ပါတယ်။
KNU ထိန်းချုပ်ထားတဲ့ ဒေသတွေကို စစ်တပ်က လက်နက်ကြီး၊ ဒရုန်းနဲ့ လူထုတွေကို ရည်ရွယ်ချက်ရှိရှိ ပစ်မှတ်ထားပြီး ပစ်ခတ်တိုက်ခိုက်ခဲ့တာကြောင့် သေဆုံးသူနဲ့ အိုးအိမ်ပစ္စည်း ပျက်စီးမှု ရှိနေတယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
