ယာရူစိင်၊ ဧပြီ ၁၁ ရက်၊ ဖယ်ခုံ
(၂၅) ကြိမ်မြောက် ကယန်းအမျိုးသားနေ့ ငွေရတု အထိမ်းအမှတ် အခမ်းအနားကျင်းပပြုလုပ်တဲ့ ရှမ်းတောင် ဖယ်ခုံမြို့နယ် သိကျိတ်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ နှစ်ဦး ဒဏ်ရာရရှိတယ်လို့ ကယန်းမျိုးဆက်သစ်လူငယ် KNGY က ထုတ်ပြန်ထားပါတယ်။
မနေ့ ဧပြီ ၁၀ ရက် ည ၁၂ နာရီဝန်းကျင်အချိန်မှာ ကယန်းအမျိုးသားနေ့ ကျင်းပတဲ့ ဖယ်ခုံမြို့နယ် သိကျိတ်ရွာကို စစ်ကောင်စီတပ်က ပေါင် ၂၀၀ ဗုံးနှစ်လုံးနဲ့ လေကြောင်းကနေ ဗုံးကြဲတိုက်ခိုက်တာကြောင့် ဒေသခံ နှစ်ဦး ဒဏ်ရာရရှိခဲ့တာဖြစ်တယ်လို့ ဒေသခံ တစ်ဦးက ရွှေဖီမြေကို ပြောပါတယ်။
“သိကျိတ်ရွာမှာ ကယန်းအမျိုးသားနေ့ ကျင်းပတာက ဒါပထမဆုံးအကြိမ် ဖြစ်တယ်။ အခမ်းအနားပြီးမှ လာကြဲသွားတာ။ အခမ်းအနားကျင်းပတဲ့ အချိန်မဟုတ်လို့ ကံကောင်းတယ် ပြောရမှာပေါ့နော်။ လင်မယားနှစ်ယောက်က ဒဏ်ရာရတာ။ အိမ်တွေလဲ သုံးအိမ်လောက် ပျက်စီးသွားတယ်။ အိမ်ခြေက ၃၀၀ ကျော်ရှိတယ်”
မနေ့ ဧပြီ ၁၀ ရက်က ကျင်းပပြုလုပ်တဲ့ ကယန်းအမျိုးသားနေ့ ငွေရတုအခမ်းအနားမှာ လူဦးရေ ၁ သောင်းနီးပါး ပါဝင်တက်ရောက်ခဲ့ကြပါတယ်။
စစ်တပ်အာဏာသိမ်းပြီးနောက်ပိုင်းမှာ စစ်ကောင်စီတပ်ရဲ့ လက်နက်ကြီးနဲ့ လေကြောင်းတိုက်ခိုက်မှုကြောင့် ကယန်းလူထုတွေ ၇၀၀ ကျော် သေဆုံးခဲ့ရတယ်လို့ ကရင်နီဒေသအခြေစိုက် သတင်းဌာနတွေက ရေးသားဖော်ပြထားကြပါတယ်။
