အင်းငယ်၊ ဇန်နဝါရီ ၁၀ ရက်၊ လွိုင်ကော်
ကရင်နီပြည်မှာ ပြီးခဲ့တဲ့ ၂၀၂၄ တစ်နှစ်တာအတွင်း ရာဇဝတ်မှု ၁၄၉ မှုအထိ ဖမ်းဆီးရမိတဲ့အထဲ မူးယစ်ဆေးဝါးအမှု ၇၅ မှုနဲ့ အများဆုံး ဖြစ်တယ်လို့ ကရင်နီပြည် ရဲတပ်ဖွဲ့- KSP ရဲ့ တာဝန်ရှိသူတွေက ပြောပါတယ်။
စစ်တပ် အာဏာ မသိမ်းခင်ကာလကတည်းက ကရင်နီပြည်မှာ မူးယစ်ဆေးဝါး ပြဿနာဟာ ရှိနှင့်ပြီးသား ဖြစ်ပေမဲ့ စစ်တပ်အာဏာ သိမ်းပြီးနောက်ပိုင်းမှာတော့ တော်လှန်ရေး အကြောင်းပြကာ ရောင်းဝယ်သုံးစွဲသူ ပိုများလာတာပဲ ဖြစ်ပါတယ်။
KSP ဒုရဲချုပ်(၂) ကိုဘိုဘိုက “မူးယစ်ဆေးမှုတွေမှာ ထောင်ဒဏ် ဘယ်လောက်ဆိုတာက သူကျူးလွန်တဲ့အပေါ်မှာ မူတည်ပြီး ကွဲပြားတာပေါ့။ များသောအားဖြင့် ရောင်းဝယ်ဖောက်ကားတယ်။ လက်ဝယ်တွေ့ရှိတယ်ဆိုရင် ထောင်ဒဏ် ၁၀ နှစ်အထိ ချလို့ရတာပေါ့” လို့ ပြောပါတယ်။
မူးယစ်ဆေးဝါး နှိမ်နင်းရေးအတွက် လက်ရှိ KSP အနေနဲ့ အင်တိုက်အားတိုက် ဆောင်ရွက်နေပေမဲ့ ရောင်းဝယ်ဖောက်ကားသူ အများစုဟာ ကျန်ရှိနေဆဲ ဖြစ်တာကြောင့် သက်ဆိုင်ရာ နယ်မြေတာဝန်ခံတွေ အနေနဲ့ မူလအရင်းအမြစ်ကို ဖော်ထုတ်ပြီး ဖြတ်တောက်နိုင်ဖို့ လိုအပ်တယ်လို့ ဆိုပါတယ်။
မူးယစ်ဆေးဝါး ပြဿနာဟာ ကရင်နီ ပြည်သူတွေအတွက် အန္တရာယ် ကြီးမားလွန်းတာကြောင့် အမြစ်ပြတ် ပပျောက်ရေးအတွက် အသိပညာ ပေးတာ၊ ရှောင်တခင် စစ်ဆေးတာ၊ ဖမ်းဆီးတာတွေ ဆောင်ရွက်နေတယ်လို့ ဒုရဲချုပ် ၂ ကိုဘိုဘိုက ဆက်ပြောပါတယ်။
“မူးယစ်ဆေးဝါး အန္တရာယ်နဲ့ ပတ်သက်ပြီး အသိပညာပေး ဟောပြောပွဲတွေကို မြေပြင်စခန်းတွေအလိုက် တတ်နိုင်သလောက်ပေါ့။ ကျောင်းတွေမှာ အသိပညာပေး ဟောပြောပွဲ လုပ်နေတာတွေ ရှိပါတယ်။ ပြီးရင်လည်း နယ်မြေတွေအလိုက် စစ်ဆေးရေးဂိတ်တွေမှာ ရှောင်တခင် စစ်ဆေးတာတွေ လုပ်ပြီးမှ မူးယစ်ဆေး ရောင်းဝယ်သုံးစွဲသူတွေကို တားဆီးရန်အလို့ငှာ လိုက်လံ ဖမ်းဆီးတာတွေ ရှိပါတယ်”
ကရင်နီပြည် ကြားကာလ အုပ်ချုပ်ရေးကောင်စီ- IEC ရဲ့ တရားရေးရာ ဌာနမှူးကြီး ခူးတော်ရယ်အက်စ်ကလည်း လက်နက်ကိုင် အဖွဲ့အစည်းတွေမှာ မူဝါဒအသီးသီး ရှိကြပေမဲ့ မူးယစ်ဆေးဝါး တိုက်ဖျက်ရေးကို အမျိုးသားရေးတာဝန် တစ်ရပ်အဖြစ် ဆောင်ရွက်ဖို့ လိုအပ်တယ်လို့ ပြောပါတယ်။
ကရင်နီပြည်မှာ ၂၀၂၄ ခုနှစ်အတွင်း ဒုတိယအများဆုံး ဖမ်းမိတဲ့အမှုဟာ စစ်ကောင်စီတပ်သား ကျူးလွန်တဲ့ စစ်ရာဇဝတ်မှုနဲ့ သူလျှိုမှုတွေဖြစ်ပြီး လက်ရှိမှာလည်း ရုံးထုတ် စစ်ဆေးနေတယ်လို့ သိရပါတယ်။
လက်ရှိ ၂၀၂၅ မှာ KSP အနေနဲ့ ရဲစခန်း ၁၄ ခု၊ ရဲကင်း ၁၈ ခုအထိ ဖွင့်လှစ်ထားနိုင်ပြီး အင်အား ၆၃၈ ဦးနဲ့ IEC စိုးမိုးနယ်မြေဖြစ်တဲ့ ကန္တာရဝတီ၊ ကြယ်ဖိုးကြီး၊ ဘောလခဲ၊ မိုးဗြဲမှာ တရားဥပဒေ စိုးမိုးရေးဆိုင်ရာလုပ်ငန်းစဉ် ဆောင်ရွက်နေကြတယ်လို့ လေ့လာတွေ့ရှိရပါတယ်။
