ပျားကြီး၊ ဖေဖော်ဝါရီ ၁၈ ရက်၊ ကနီ
စစ်ကိုင်းတိုင်း ကနီမြို့နယ် ချောင်းမကျေးရွာကို စစ်ကောင်စီတပ်က စက်တပ်လေထီး (Paramoter)နဲ့ ဗုံးကြဲတိုက်ခိုက်ခဲ့တာကြောင့် လူ ၅ ဦး သေဆုံးပြီး ၂၀ ကျော် ထိခိုက်ဒဏ်ရာ ရခဲ့တယ်လို့ ဒေသခံတွေက ပြောပါတယ်။
ဒီနေ့ညနေ ၄ နာရီခန့်က ဖြစ်ပွားခဲ့တဲ့ ဗုံးကြဲတိုက်ခိုက်မှုကြောင့် မုံရွာ-ကလေးဝလမ်းနဲ့ မုံရွာ-ကနီလမ်းဆုံမှာရှိတဲ့ ချောင်းမရွာက စားသောက်ဆိုင်ထဲ ရှိနေသူတွေ ထိခိုက်မှု ရှိခဲ့တာ ဖြစ်ပါတယ်။
“၁၂၀ မမ နဲ့ ၂ လုံး ကြဲလိုက်တာပဲ။ စားသောက်ဆိုင်ထဲက လူတွေ ထိကုန်တာ။ အကုန်လုံး မွစာ ကြဲကုန်တယ်” လို့ မျက်မြင်တွေ့ခဲ့ရသူ ဒေသခံတစ်ဦးက ပြောပါတယ်။
မုံရွာမြို့က ထွက်ခွာလာတဲ့ ခရီးသည်တင် မော်တော်ယာဥ်တွေ ခေတ္တရပ်နားလေ့ရှိရာ ဈေးဆိုင်တန်းရှိတဲ့ ချောင်းမရွာကို ဗုံးကြဲတိုက်ခိုက်ခဲ့တာကြောင့် ကလေးဝနဲ့ ကနီမြို့နယ်မှ ဒေသခံ ခရီးသွားတွေ ထိခိုက်ဒဏ်ရာ ရရှိခဲ့တာ ဖြစ်ပါတယ်။
မနေ့ ဖေဖော်ဝါရီ ၁၇ ရက်ကလည်း ချောင်းမရွာအနီးက မုဌောရွာကို လေကြောင်းကနေ ဗုံးကြဲတိုက်ခိုက်ခဲ့တာကြောင့် ထိခိုက်ဒဏ်ရာရသူ ရှိခဲ့ပြီး အခုဖြစ်စဥ်မတိုင်ခင်အထိ ဖေဖော်ဝါရီလအတွင်း လေကြောင်းတိုက်ခိုက်မှုနဲ့ လက်နက်ကြီး ပစ်ခတ်မှုကြောင့် လူထု ၁၀ ဦးထက်မနည်း အသက်ဆုံးရှုံးခဲ့ရတယ်လို့ ဒေသခံတွေက ပြောဆိုပါတယ်။
