မိုင်းရူပ၊ အောက်တိုဘာ ၁၇ ရက်၊ သီပေါ
တအာင်းတပ်မတော် PSLF/TNLA ထိန်းချုပ်ထားတဲ့ ရှမ်းမြောက် သီပေါမြို့ရဲ့ နေရာအများစုကို စစ်ကောင်စီတပ်က ပြန်ထိန်းချုပ်လိုက်ပြီး မြို့ပြင်မှာလည်း ပစ်ခတ်သံတွေ ဆက်ကြားနေရတယ်လို့ ဒေသခံတွေက ပြောပါတယ်။
ဒီနေ့ အောက်တိုဘာလ ၁၇ ရက်မှာ စစ်ကောင်စီတပ်က သီပေါမြို့ရဲ့ နေရာအများစုကို ပြန်ထိန်းချုပ်နိုင်ခဲ့တာဖြစ်ပြီး သီပေါ – နမ္မတူသွားလမ်း မြို့ပြင်ရှိ စစ်ကောင်စီတပ်ရဲ့ ခြေမြန်တပ်ရင်း-၅၀၃၊ ၅၀၄ တပ်မှာ ပစ်ခတ်သံတွေ ဆက်ကြားနေရတယ်လို့ ဆိုပါတယ်။
“မြို့တွင်းထဲက ပစ်ခတ်သံတွေ မကြားရတော့ဘူး။ အသံတွေက တဖြည်းဖြည်းနဲ့ ဝေးဝေးသွားတယ်။ ၅၀၃၊ ၅၀၄ ဘက်မှာတော့ လက်နက်ကြီးသံတွေ ကြားရသေးတယ်” လို့ သီပေါဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီထောက်ခံတဲ့ တယ်လီဂရမ်ချယ်နယ်တွေမှာတော့ သီပေါမြို့လယ်မှာ ရောက်နေတဲ့ စစ်ကောင်စီ တပ်ဖွဲ့ဝင်တွေကို ကြိုဆိုနေတဲ့ ဓာတ်ပုံတွေနဲ့ ဒီနေ့ နေ့လည်ပိုင်းမှာ ဝါဒဖြန့် ဖော်ပြနေတာတွေ တွေ့ရပါတယ်။
တအာင်းတပ်ဘက်ကတော့ သီပေါမြို့အခြေအနေနဲ့ ပတ်သက်ပြီး တစုံတရာ သတင်းထုတ်ပြန်ထာတာ မရှိသေးပါဘူး။
စစ်ကောင်စီတပ်က သီပေါမြို့ကို ပြန်ရဖို့ ပြီးခဲ့တဲ့ အောက်တိုဘာလ ပထမအပတ်ကစပြီး ထိုးစစ်ဆင်တိုက်ခိုက်ခဲ့ရာ ၂ ပတ်ကျော်အကြာမှာ သီပေါမြို့ကို ပြန်ထိန်းချုပ်နိုင်တာ ဖြစ်ပါတယ်။
တအာင်းတပ် ထိန်းချုပ်ထားတဲ့ ကျောက်မဲမြို့ကိုလည်း စစ်ကောင်စီက ပြီးခဲ့တဲ့ အောက်တိုဘာ ၁ ရက်မှာ ပြန်ထိန်းချုပ်နိုင်ခဲ့ပြီး လက်ရှိမှာ မန္တလေး – လားရှိုး ပြည်ထောင်စုလမ်းမကြီးကို စစ်ကောင်စီဘက်က ပြန်ထိန်းချုပ်နိုင်ခဲ့ပြီ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
