ယာရူစိင်၊ နိုဝင်ဘာ ၁၇ ရက်၊ သီပေါ
စစ်ကောင်စီတပ် ပြန်လည်ထိန်းချုပ်ထားတဲ့ သီပေါမြို့မှာ တအာင်းတပ် TNLA၊ ပြည်သူ့ကာကွယ်ရေးတပ်ဖွဲ့တွေနဲ့ စပ်ဆက်တယ်ဆိုတဲ့ စွပ်စွဲချက်နဲ့ ဒေသခံ ၅ ဦးကို စစ်ကောင်စီတပ်က ထပ်မံဖမ်းဆီးတယ်လို့ ဒီဖြစ်စဉ်ကို သိရှိသူတစ်ဦးက ပြောပါတယ်။
သီပေါမြို့နယ် စံဖိတ်ရွာနဲ့ မြို့ပေါ်ရှိ ရပ်ကွက်တချို့က ဒေသခံ အမျိုးသား ၄ ဦးနဲ့ အမျိုးသမီး ၁ ဦးတို့က ထပ်မံဖမ်းဆီးခံရတာ ဖြစ်ပါတယ်။
“နေအိမ်ချိတ်ပိတ်တာတော့ စစ်ကောင်စီဘက် ဒီတလောအတွင်း ထပ်ပိတ်တာမျိုးတော့ မတွေ့ရသေးဘူး။ ဖမ်းဆီးတာက ပိုများလာတာ”လို့ ဒီဖြစ်စဉ်ကို သိရှိသူတစ်ဦးက ပြောပါတယ်။
ဖမ်းဆီးခံရတဲ့ အမျိုးသမီးဟာ အသက် ၂၃ နှစ်အရွယ် ယဉ်အေးဆိုသူဖြစ်ပြီး ဖမ်းဆီးခံရတဲ့ အမျိုးသား ၄ ဦးထဲမှာ အသက် ၇၁ နှစ်အရွယ် အဘိုးအို ၁ ဦးလည်း ပါဝင်တယ်လို့ ဆိုပါတယ်။
“လူငယ်ပိုင်းတွေကိုကျ ပြန်မလွှတ်ဘူး။ စစ်မှုထမ်းစာရင်းထဲကို ထည့်လိုက်တာ ဖြစ်ဖို့များပါတယ်။ သိသလောက်ဆို ဖမ်းဆီးခံရတဲ့ သူတွေက လူလတ်ပိုင်းတွေက ပိုများပါတယ်”လို့ နောက်ထပ် ဒီဖြစ်စဉ်ကို သိရှိသူတစ်ဦးက ပြောပါတယ်။
စစ်ကောင်စီတပ်ဟာ တော်လှန်ရေးအင်အားစုတွေကို ကူညီထောက်ပံ့တယ်ဆိုတဲ့ စွပ်စွဲချက်နဲ့ ၎င်းတို့ ပြန်လည်ထိန်းချုပ်ထားတဲ့ ကျောက်မဲနဲ့ သီပေါမြို့က ဒေသခံတွေကို နေ့စဉ်ဆက်တိုက် ဖမ်းဆီးစစ်ဆေးနေတာပဲ ဖြစ်ပါတယ်။
ဒါ့အပြင် TNLA အမှတ်အသားဖြစ်တဲ့ တံဆိပ်၊ အလံ၊ ပြက္ခဒိန်၊ တအာင်းထီလက်မှတ်၊ ဓာတ်ပုံ စတဲ့ပစ္စည်းတွေကို တွေ့ရှိရင်လည်း TNLA နဲ့ ဆက်စပ်တယ်ဆိုပြီး စစ်ကောင်စီတပ်က လိုက်လံဖမ်းဆီးစစ်ဆေးနေတာ ဖြစ်ပါတယ်။
ပြီးခဲ့တဲ့ နိုဝင်ဘာ ၁၃ ရက် မနက် ၁၁ နာရီဝန်းကျင်မှာလည်း ကျောက်မဲမြို့ နယ်မြေ (၃) ထဲမှာ နေထိုင်တဲ့ အသက် ၅၀ ဝန်းကျင်ရှိတဲ့ အမျိုးသမီးတစ်ဦးကို စစ်ကောင်စီတပ်က ဖမ်းဆီးသွားခဲ့ပါသေးတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
