ယာရူစိင်၊ အောက်တိုဘာ ၁၄ ရက်၊ သီပေါ
တအာင်းတပ် PSLF/TNLA ထိန်းချုပ်ထားတဲ့ သီပေါမြို့နယ်ရှိ ကျေးရွာ ၅ ရွာကို စစ်ကောင်စီတပ်က ပေါင် Y-12လေယာဉ်နဲ့ ဗုံးအလုံးရေ ၄၀ ကျော်ကြဲချတိုက်ခိုက်ခဲ့တယ်လို့ ရှေ့တန်းစစ်မြေပြင်မှာရှိနေသူတစ်ဦးက ရွှေဖီမြေကို ပြောပါတယ်။
ဒီနေ့ အောက်တိုဘာ ၁၄ ရက် ညနေ ၄ နာရီ ၄၅ မိနစ်မှာ သီပေါမြို့နယ် နားလွယ်၊ နမ့်ဟူးနွဲ့၊ ခါလိန်၊ မန်ဟဲနဲ့ ဂေါတန်ရွာအပါအဝင်စတဲ့ ကျေးရွာများကို စစ်ကောင်စီတပ်က Y12 နဲ့ ဗုံးကြဲတိုက်ခိုက်ခဲ့ပါတယ်။
“သီပေါမြို့ နားလွယ်ရွာကနေ ဘော်ကြိုအထိ ရှိသမျှကျေးရွာအများစုကို ကြဲသွားတာပါ။ လက်ရှိအချိန်ထိတော့ ထိခိုက်မှုတွေ မသိရသေးပါဘူး။ ရွာထဲကိုကြဲတာတော့ မဟုတ်ဘူး။ ကျေးရွာရဲ့ ဘေးပတ်လည်တွေမှာ ကြဲတာ။ ဒေသခံတွေတော့ ရှောင်ကုန်ကြပါပြီ။ လက်ရှိသိရတဲ့ စာရင်းကတော့ ခါလိန်ရွာမှာတော့ နေအိမ် ၃ အိမ်လောက်ပျက်စီးသွားတယ်”လို့ နောက်ထပ် မြေပြင်အခြေအနေသိရှိသူတစ်ဦးက ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ထိခိုက်သေဆုံးမှု၊နေအိမ်အပျက်အစီးနဲ့ ပတ်သက်ပြီး ရွှေဖီမြေအနေနဲ့ ဆက်လက်စုံစမ်းနေဆဲဖြစ်ပါတယ်။
သီပေါမြို့ကို ထိုးစစ်ဆင်နေတဲ့ စစ်ကောင်စီတပ်ဟာ သီပေါမြို့ နားခဲကျေးရွာအထိ ရောက်ရှိလာပြီး တအာင်းတပ် ထိန်းချုပ်ဒေသအများအပြားကို လေကြောင်းကနေ ဆက်တိုက်ဗုံးကြဲနေပြီး ၂ပတ်အတွင်း သေဆုံးသူ ၃၀ကျော်ရှိလာပြီ ဖြစ်ပါတယ်။
၁ နှစ်ကျော်ကြာ တအာင်းတပ်ထိန်းချုပ်ထားတဲ့ လားရှိုး – မန္တလေးလမ်းအပေါ်ရှိ ကျောက်မဲမြို့ကို စစ်ကောင်စီဘက်က ပြီးခဲ့တဲ့ အောက်တိုဘာ ၁ ရက်မှာ ပြန်ထိန်းချုပ်နိုင်ခဲ့တာ ဖြစ်ပြီး သီပေါမြို့ဘက်ကို ဆက်တိုက် ပြန်ထိုးစစ်ဆင်နေတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
