မိုင်းရူပ၊ ဇန်နဝါရီ ၁၆ ရက်၊ ဆီဆိုင်
ရှမ်းတောင် ပအိုဝ်းဒေသ ဆီဆိုင်မြို့နယ်ရှိ ပအိုဝ်းတပ်မတော်- PNLA ထိန်းချုပ်ထားတဲ့ နေရာတွေကို စစ်ကောင်စီတပ်နဲ့ ပအိုဝ်းပြည်သူ့စစ်- PNO ပူးပေါင်းတပ်က ထိုးစစ်ဆင်နေပါတယ်။
ဒီရက်ပိုင်းအတွင်း PNLA ထိန်းချုပ်ထားတဲ့ ဆီဆိုင်မြို့နယ် ထီစုံကျေးရွာအနီးတစ်ဝိုက်မှာ တိုက်ပွဲ ဖြစ်ပွားနေတယ်လို့ ဆီဆိုင်ဒေသခံတစ်ဦးက ရွှေဖီမြေကို ပြောပါတယ်။
“နယ်မြေရှင်းလင်းရေးတွေ လုပ်နေတယ်လို့ သိရတယ်။ လက်နက်ကြီးနဲ့လည်း ဆက်တိုက် ပစ်နေတယ်။ PNLA ထိန်းချုပ်ထားတဲ့နေရာတွေကို စစ်ကြောင်း ထိုးနေတာ”
ဇန်နဝါရီ ၁၄ ရက်မှာ PNLA ထိန်းချုပ်ထားတဲ့ ဆီဆိုင်မြို့နယ် နောင်ထောဝ်ရွာကို လေကြောင်းကနေ ဗုံးကြဲတိုက်ခိုက်ခဲ့ရာ နောင်ထောဝ်ရဲစခန်းနဲ့ ကျေးရွာဓမ္မာရုံ ပျက်စီးခဲ့ပါတယ်။
ပြီးခဲ့တဲ့ ဇန်နဝါရီ ၁၃ ရက်မှာလည်း ဖမ်းဆီးခံရတဲ့ PNLA ရဲ့ တပ်ဖွဲ့ဝင် ၅ ဦးကို PNO က သတ်ဖြတ်ခဲ့တယ်လို့ PNLA က ထုတ်ပြန်ထားပါတယ်။
လက်ရှိ ဖြစ်ပွားနေတဲ့ တိုက်ပွဲဟာ ပအိုဝ်းလူမျိုးအချင်းချင်း ဖြစ်နေတာမဟုတ်ဘဲ စစ်အာဏာရှင်စနစ်ကို တိုက်ခိုက်နေတာဖြစ်တယ်လို့ PNLA က ပြောဆိုထားပါတယ်။
စစ်တပ်နဲ့ PNLA ဘက်ကတော့ လက်ရှိ ဖြစ်ပွားနေတဲ့ တိုက်ပွဲနဲ့ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
