ရွှေဖီမြေ၊ မေလ ၉ ရက်၊ မြိတ်
တနင်္သာရီတိုင်း မြိတ်-ထားဝယ်ခရိုင် ထီးခီးဒေသမှာရှိတဲ့ စစ်ကောင်စီတပ် အခြေစိုက်စခန်းကို ကရင်တပ်မတော်- KNU/KNLA နဲ့ ပူးပေါင်းတပ်ဖွဲ့က သိမ်းပိုက်နိုင်ခဲ့တယ်လို့ KNU က ထုတ်ပြန်လာပါတယ်။
ထီးခီးစခန်းကို KNU/KNLA နဲ့ မဟာမိတ် ပူးပေါင်းတပ်ဖွဲ့က မေလ ၂ ရက်ကနေ စတင်ထိုးစစ်ဆင် တိုက်ခိုက်ခဲ့ပြီး ဒီနေ့ မေလ ၉ ရက် မနက်ပိုင်းမှာ တပ်စခန်းတစ်ခုလုံးကို သိမ်းပိုက်နိုင်ခဲ့တာပဲ ဖြစ်ပါတယ်။
ကမ်းရိုးတန်းဒေသ တိုင်းစစ်ဌာနချုပ် လက်အောက်ခံ ခြေလျင်တပ်ရင်း (ခလရ ၂၇၃) အခြေစိုက်ထားတဲ့ ထီးခီးစခန်းမှာ စစ်ကောင်စီတပ် အင်အား ၁၅၀ ခန့် အထိုင်ချ တပ်စွဲထားတယ်လို့ ဖော်ပြထားပါတယ်။
ထီးခီးစခန်းသိမ်းတိုက်ပွဲအတွင်း ဖမ်းဆီးရမိတဲ့ စစ်သုံ့ပန်းနဲ့ နှစ်ဖက်ထိခိုက်သေဆုံးမှုအပါအဝင် သိမ်းဆည်းရမိတဲ့ လက်နက်ခဲယမ်း အခြေအနေတွေကိုတော့ အသေးစိတ် ဖော်ပြထားတာ မရှိသေးပါဘူး။
ပြီးခဲ့တဲ့ ဧပြီ ၁၉ ရက်ကလည်း ထီးခီးစခန်းနဲ့ ၇ မိုင်ခန့်အကွာက စစ်ကောင်စီရဲ့ ထီးထာဗျူဟာကုန်းကို KNLA နဲ့ မဟာမိတ်ပူးပေါင်းတပ်ဖွဲ့က တိုက်ခိုက်သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
၁၉၉၇ ခုနှစ်မှာ စစ်ကောင်စီရဲ့ တပ်မ ၅၅၊ ၆၆ ဦးဆောင်တဲ့ တပ်ရင်း ၂၀ ခန့်က မေဂျာအော်ပရေးရှင်းအနေနဲ့ ထီးခီးဒေသကို ထိုးစစ်ဆင် တိုက်ခိုက်ခဲ့တာကြောင့် ၁၉၉၇ ခုနှစ်မှာ ထီးခီးဒေသကို လက်လွှတ်ခဲ့ရတယ်လို့ ဆိုပါတယ်။
KNLA အနေနဲ့ လက်လွှတ်ခဲ့ရတဲ့ ထီးခီးဒေသကို ပြန်လည် သိမ်းပိုက်နိုင်ခဲ့ပြီး ဒေသတွင်းရှိ လူထုတွေရဲ့ အသက်အိုးအိမ် ကာကွယ်ရေးလုပ်ငန်းကို ဆက်လက် လုပ်ဆောင်သွားမှာ ဖြစ်တယ်လို့ ဆက်လက် ဖော်ပြထားပါတယ်။
