လွေးလာဝ်ဇာရ်၊ ဧပြီ ၂၁ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ် သင်တောကျေးရွာက ကိုးတောင်ဘို့တောင်ဘက်ကို စစ်ကောင်စီတပ်က ဂျက်ဖိုက်တာနဲ့ ၂ ကြိမ် ဗုံးကြဲချမှုကြောင့် မိသားဝင် ၆ ဦး သေဆုံးပြီး ၂ ဦး ထိခိုက်ဒဏ်ရာ ရခဲ့တယ်လို့ ဒေသခံ အမျိုးသားတစ်ဦးက ပြောပါတယ်။
မနေ့ ဧပြီ ၂၀ ရက် ညနေ ၆ နာရီခွဲမှာ ဒေါ်မူချို ကုန်စုံဆိုင်တည့်တည့် ပစ်ချခဲ့တာကြောင့် မိသားဝင် ၆ ဦး သေဆုံးပြီး ဘေးအိမ်က ၂ ဦးလည်း ဒဏ်ရာရခဲ့တဲ့အပြင် နေအိမ်လည်း ထိခိုက်ပျက်စီးခဲ့တယ်လို့ ဆိုပါတယ်။
ဒေသခံ အမျိုးသားတစ်ဦးက “မနေ့ညနေမှာ ဂျက်လေယာဉ်နဲ့ လာရောက် ပစ်ချသွားတယ်။ ဒေါ်မူချို ကုန်စုံဆိုင်အပေါ် ကျတာ။ သူတို့ မိသားစုဝင် ၆ ဦး သေတယ်။ ဘေးအိမ်က ၂ ယောက်လည်း ဒဏ်ရာ ရတယ်။ ဒဏ်ရာရတဲ့ နှစ်ယောက်ရဲ့ နေအိမ်တစ်လုံးပါ မီးလောင်သွားတယ်” လို့ ပြောပါတယ်။
သေဆုံးသွားသူတွေဟာ အမျိုးသား ၃ ဦးနဲ့ အမျိုးသမီး ၃ ဦးဖြစ်ပြီး နောက် အမျိုးသား ၂ ဦးကတော့ ဒဏ်ရာ အပြင်းအထန် ရခဲ့တယ်လို့ အထက်ပါ အမျိုးသားက ပြောဆိုပါတယ်။
သေဆုံးသွားတဲ့ အမျိုးသမီး ၃ ဦးထဲက တစ်ဦးဟာ ၈ လသားအရွယ် ကလေးငယ်တစ်ဦးရဲ့ မိခင်ဖြစ်ပြီး ကလေးငယ်ကတော့ အသက်ရှင်လျက် ကျန်ရှိနေတယ်လို့ ပြောပါတယ်။
ပြီးခဲ့တဲ့ ဧပြီ ၁၉ ရက်မှာလည်း မန္တလေးတိုင်း သပိတ်ကျင်းမြို့နယ်က ရေထွက်ရွာကို လေကြောင်းနဲ့ ပေါင် ၂၀၀ ဗုံး ကြဲချတိုက်ခိုက်လို့ ကလေးငယ်အပါအဝင် ၂၄ ဦး သေဆုံးပြီး ၃၀ ဝန်းကျင် ထိခိုက်ဒဏ်ရာ ရခဲ့တယ်လို့ သိရပါတယ်။
