ခိုင်လေး၊ မတ်လ ၁၅ ရက်၊ မြိုင်
မကွေးတိုင်း မြိုင်မြို့နယ် ဝယ်တောင်ရွာက ဘုန်းကြီးကျောင်းကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ကိုရင်ကြီးတစ်ပါးအပါအဝင် ၃ ဦး သေဆုံးပြီး ၁၀ ဦး ထက်မနည်း ဒဏ်ရာ ရခဲ့ပါတယ်။
မနေ့ မတ်လ ၁၄ ရက် နေ့လယ် ၁၂ နာရီခန့်က ဆူးဝင်း၊ ဝယ်တောင်ရွာ ဘုန်းကြီးကျောင်းနဲ့ ဝယ်တောင်ရွာ မြောက်ပိုင်းကို မကွေးလေတပ်မှ ဂျက်ဖိုက်တာ နှစ်စီး၊ မိတ္ထီလာလေတပ်မှ ဂျက်ဖိုက်တာတစ်စီး စုစုပေါင်း ဂျက်ဖိုက်တာသုံးစီးနဲ့ တိုက်ခိုက်ခဲ့တာလို့ We Love Myaing မှ တာဝန်ရှိသူတစ်ဦးက ရွှေဖီမြေကို ပြောပါတယ်။
“တိုက်ပွဲ ဖြစ်ပွားတာမျိုး မရှိဘူး။ လေကြောင်းနဲ့ ၆ ကြိမ် တိုက်ခိုက်ခဲ့တယ်။ ပစ်လိုက်တဲ့ လက်နက်ကြီးကြောင့် ဘုန်းကြီးကျောင်းတစ်ခုလုံး မီးလောင်ပြိုကျခဲ့တယ်။ အဲမှာဘုန်းကြီးတစ်ပါး၊ ကိုရင်သုံးပါး၊ ပြည်သူခြောက်ဦး ထိခိုက်ဒဏ်ရာ ရတယ်”
တိုက်ခိုက်မှုကြောင့် ဝယ်တောင်ရွာ ဘုန်းကြီးကျောင်းပေါ် လက်နက်ကြီး ကျရောက်ပေါက်ကွဲခဲ့ရာ အသက် ၃၀ ကျော်အရွယ် ကိုရင်းကြီးတစ်ပါးနဲ့ ၂၀ ကျော်အရွယ် အမျိုးသားနှစ်ဦးသေဆုံးခဲ့တယ်လို့ ဆိုပါတယ်။
အလားတူ ဆူးဝင်းရွာက ဒေသခံတွေရဲ့ နေအိမ်တစ်လုံးပေါ် လက်နက်ကြီး ကျရောက်ပေါက်ကွဲခဲ့တာကြောင့် နေအိမ်တစ်လုံး မီးလောင်ပျက်စီးခဲ့ပြီး ဒေသခံ ၂ ဦး ထိခိုက်ဒဏ်ရာ ရခဲ့ပါတယ်။
ဝယ်တောင်ရွာ မြောက်ပိုင်းဘက်မှာလည်း လေကြောင်းကနေ ပစ်ခတ်တဲ့ လက်နက်ကြီး ကျရောက်ပေါက်ကွဲခဲ့တာကြောင့် ဒေသခံတွေရဲ့နေအိမ် ၄ လုံး မီးလောင်ပျက်စီးခဲ့ပြီး ဒေသခံ ၇ ဦး ထိခိုက်ဒဏ်ရာ ရခဲ့တယ်လို့ ဆိုပါတယ်။
ပြီးခဲ့တဲ့ မတ်လ ၁၁ ရက် နေ့လယ် ၃ နာရီခွဲခန့်က ဆိပ်ဖြူ ကပစ ၂၂ မှ စက်တပ်လေထီးတစ်စီးနဲ့ ပေါက်မြို့နယ် အရှေ့ပိုင်း ထောက်ရှာပင်ရွာ စာသင်ကျောင်းအနီးဝန်းကျင်ကို လေကြောင်းကနေဗုံးကြဲခဲ့တာကြောင့် အသက် ၅၀ ကျော်အရွယ် အမျိုးသမီးတစ်ဦး သေဆုံးခဲ့ပြီး ကျောင်းသားတစ်ဦးလည်း ဒဏ်ရာ ရခဲ့ပါတယ်။
အလားတူ မတ်လ ၃ ရက်ကလည်း ပခုက္ကူခရိုင် မြိုင်နဲ့ ပေါက်မြို့နယ်အစပ်က ရွာတွေကို စစ်တပ်က လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၁၂ ဦး သေဆုံးပြီး ၁၅ ဦး ဒဏ်ရာ ရရှိခဲ့ပါတယ်။
